"Düşünürəm ki, Cənubi Koreyada siyasi mənzərə prezident Yoon Suk Yeola qarşı uğursuz impiçment cəhdindən sonra bir neçə istiqamətdə inkişaf edə bilər".
Bu sözləri Azərbaycan Yəhudi Media Mərkəzinin politoloqu Rüstəm Tağızadə Hit.az-a açıqlama verib.
O bildirib ki, Cənubi Koreyada hərbi vəziyyət elanı və onun rədd edilməsi ətrafında mübahisə hakim Xalq Gücü Partiyası ilə müxalif Koreya Demokratik Partiyası arasında fikir ayrılıqlarını dərinləşdirə bilər:
"Narazılıq artdıqca isə ictimai etirazlar güclənə bilər. Fövqəladə səlahiyyətlərdən istifadə ilə bağlı müzakirələr gələcəkdə səlahiyyətlərin potensial sui-istifadəsinin qarşısını almaq üçün qanunvericilik islahatlarının aparılmasına təkan verə bilər.
Eyni zamanda, Koreya Demokratik Partiyasının Yoonu impiçment etmək öhdəliyi ilə və “ölkəni normal vəziyyətə qaytarmaq” məqsədi ilə gələcək seçkilər ərəfəsində siyasi risklər artacaq".
Onun sözlərinə görə, Yoonun populyarlığı və partiyasının birləşmək bacarığı seçki nəticələrinə əhəmiyyətli dərəcədə təsir göstərə bilər:
"İctimaiyyətin impiçment cəhdinə reaksiyası və hərbi vəziyyətin elan edilməsi demokratik proseslərə inamın formalaşmasında mühüm rol oynayacaq. Davamlı etirazlar vətəndaşların demokratik normaların qorunmasına sadiqliyini göstərir.
Bu gərginlik Cənubi Koreyanın Şimali Koreya ilə münasibətlər, ABŞ ilə müttəfiqlik idarəçiliyi və regional dinamika da daxil olmaqla, aktual məsələlərə diqqətini təsir edə bilər".
Rüstəm Tağızadə Cənubi Koreyadakı proseslərin gələcəyi ilə bağlı da bunları deyib:
"Cənubi Koreya təhlükəli siyasi anla üz-üzədir. Həm iqtidar, həm də müxalifət partiyalarının növbəti addımları onun demokratik və institusional gələcəyi üçün mühüm əhəmiyyət kəsb edəcək".
Pərviz
