Millimizin DÇ-2026-dakı rəqibləri müəyyənləşdi

Bu gün futbol üzrə 2026-cı il dünya çempionatının seçmə mərhələsinin püşkatma mərasimi keçirilib.

"Football-plus.az" xəbər verir ki, tədbir İsveçrənin Sürix şəhərində təşkil olunub. Püşkatmada millimizin rəqiblərinin də adına aydınlıq gəlib. Püşkün nəticəsinə görə, Azərbaycan millisi 4 komandalı qrupa düşüb. D qrupunda millimizin rəqibləri Millətlər Liqasında Fransa - Xorvatiya cütünün qalibi, Ukrayna və İslandiya komandaları olub.

DÇ-2026-nın Avropa seçmə mərhələsinə 2025-ci martında start veriləcək, 2026-cı martında isə pley-off oyunları ilə yekun vurulacaq. Seçmə mərhələdə 12 qrup təşkil ediləcək. Hər qrupda 4 və ya 5 komanda iştirak edəcək. 5 komandalı qruplarda oyunlar 2025-ci ilin martında, 4 komandalı qruplarda isə sentyabrda başlanacaq. Rəqiblər bir-birinə qarşı evdə və səfərdə olmaqla 2 oyun keçirəcək. Qrup mərhələsinə 2025-ci ilin noyabrında yekun vurulacaq.

Qeyd edək ki, DÇ-2026-nın final mərhələsi iyunun 11-dən iyulun 19-dək Kanada, Meksika və ABŞ-də təşkil olunacaq. Bu mundial tarixdə ilk dəfə 48 komandanın iştirakı ilə keçiriləcək.