Bu gün "Azərbaycan Dəmir Yolları" QSC rəhbərliyinin təşəbbüsü ilə Azərbaycan jurnalistlərinin Yeni il təbrikli şənliyində maraqlı anlar yaşandı...
QSC- nin Kommunikasiya Departamentinin rəhbəri Aybəniz xanım İsmayılova əvvəlcə jurnalistlərin Yeni ilini rəhbərlik adından təbrik etdi. Sonra Azərbaycan Dəmir Yolunun keçdiyi şanlı tarixi yol barədə xüsusi sujet təqdim edildi, son illər həyata vəsiqə alan layihələrdən bəhs olundu.
Daha sonra bayram tədbirində iştirak edən jurnalistlər onlayn sual- cavab platformasında imtahan edildi. 10 sualın hamısı Azərbaycan Dəmi Yolunun fəaliyyəti və perspektivli layihələri, tarixi keçmişi barədə idi. Sualları cavablandıran yüzə yaxın iştirakçılar arasından 5 qalib müəyyən olundu, onlaraükafatlar təqdim edildi.
Bayram tədbirinin ən maraqlı məqamlarından biri də lotoreya oyununda qaliblik idi. Belə ki, tədbir iştirakçılarının qeydiyyatı aparılarkən hər iştirakçıya bir lototeya təqdim edilmişdi. Sonradan həmin lototeyaların nömrələri uduşlu oyuna daxil edildi. 15 qalib müəyyənləşdirildi və hər bir jurnalistə qiymətli hədiyyələr təqdim olundu.
Bayram şənliyi həm də konsert proqramı ilə daha maraqlı edildi. Jurnalistlər musiqi sədaları altında rəqsə dəvət olundular, ardınca Azərbaycanın qatar stansiyalarının sıralamasını tapma oyunu ilə imtahana çəkildilər. Bu oyunda da 5 nəfərdən ibarət iki komanda yarışa qoşuldu. Qalib komanda hədiyyələrlə mükafatlandırıldı.
Nəhayət, bayram şənliyində iştirak edən hər bir jurnalistə "Azərbaycan Dəmir Yolları" QSC rəhbərliyi adından xüsusi qiymətli xatirə hədiyyələrindən ibarət kompleks bağlama təqdim olundu.
Beləliklə, Azərbaycan Dəmir Yollarının tarixi keçmişinə, bu günkü uğurlarına bir daha informatik şahidlik edən jurnalistlərin Yeni il bayramı xüsusi təqdimatlarla yaddaqalan edildi.
"Təzadlar" olaraq biz də kollektivimiz və oxucularımız adından "Azərbaycan Dəmir Yolları" rəhbərliyinə media işçilərinə göstərilən bu diqqətə görə təşəkkürümüzü bildirir, Azərbaycanın Dəmir Yolları kollektivinin Yeni ilini ürəkdən təbrik edirik!
A.Məmmədli
