Ötən gün dərc olunmuş məlumatlar fonunda beynəlxalq birjalarda dollar major valyutalar qarşısında bir qədər bahalaşıb.
Cari həftənin əvvəlindən EUR/USD valyuta cütlüyü 1.0474 səviyyəsindən 1.0534 səviyyəsinə qədər bahalaşsa da, bugün səhər saatlarında 1.0506 səviyyəsinə qədər eniş sərgiləyib. Qızılın qiyməti eniş tendensiyasını davam etdirir. Dəyərli metal 2644$-a qədər ucuzlaşandan bir qədər bahalaşıb və 2650$ səviyyəsində qərarlaşıb.
Dünən dərc olunan məlumatlara əsasən, ABŞ-ın Sənaye Sektorunda Biznes Aktivliyi İndeksi (PMI) noyabr ayı ilə müqayisədə dekabr ayında 49.7 bənd səviyyəsindən 48.3 bənd səviyyəsinə qədər enib. Xidmət sektoru üzrə açıqlanan PMI göstəricisi proqnozları üstələyib. Belə ki, indeks 56.1 bənddən 58.5 bəndədək yüksəlib. Bu dövrdə 38 ayın ən yüksək səviyyəsini qeyd edən və bazar gözləntilərinin üzərində olan indeksin 55.7 bəndə çatacağı təxmin edilirdi.
Həmçinin, Avrozonanın Sənaye Sektorunda Biznes Aktivliyi İndeksi, ilkin məlumatlara görə, noyabr ayında olduğu kimi, dekabr ayında da 45.2 bənd təşkil edib. Analitiklər göstəricinin 45.3 bənd səviyyəsinədək yüksələcəyini proqnoz etmişdilər. Birliyin xidmət sektorunda PMI isə 49.5 bənddən 51.4 bəndədək yüksəlib. Almaniyanın sənaye sektorunda PMI noyabr ayı ilə müqayisədə dekabr ayında 43 bənd səviyyəsindən 42.5 bənd səviyyəsinə qədər geriləyib. Xidmət sektorunda isə PMI indeksinin 49.3 bənddən 49.5 bəndədək yüksələcəyi ehtimal olunsa da, göstərici proqnozları üstələyib və 51 bənd səviyyəsində dərc olunub.
Bazar ertəsi günü “Bitcoin” 107810$ səviyyəsinə qədər bahalaşaraq yeni tarixi rekordunu təyin edib. Analitiklərin fikrincə, məzənnə Donald Trump administrasiyasının rəhbərliyi altında əlverişli kriptovalyuta siyasətinin proqnozları ilə dəstəklənir. Verilən məlumatlara əsasən, onun ABŞ prezidenti seçilməsindən sonra “Bitcoin ETF”-ləri 9.3 milyard dollar vəsait cəlb edə biliblər.
Bugün ABŞ-da Bakı vaxtı ilə saat 17:30-da dərc olunacaq Pərakəndə Satış Dövriyyəsinin Həcmi və saat 18:15-də açıqlanacaq Sənaye Sektorunda İstehsal Həcmi göstəriciləri bazar iştirakçılarının diqqət mərkəzində olacaq əsas xəbərlərdəndir. Eləcə də, bugün Böyük Britaniyada İşsizlik Səviyyəsi, Almaniyada “IFO” Biznes Mühiti İndeksi, Avrozonada Ticarət Saldosu və Kanadada İstehlak Qiymətləri İndeksi göstəriciləri dərc olunacaq.
Məlumat İnvest-AZ İnvestisiya Şirkətinin analitikləri tərəfindən hazırlaanıb.
