Əməkdaşlıq perspektivlərinin müəyyənləşdirilməsi, Asiyanın fərqli ölkələrində ədəbiyyatla bağlı tədqiqatlar aparan alim və mütəxəssislərin bir araya toplaşması çox əhəmiyyətlidir.
AMEA-dan bildirilib ki, bunu “Asiya xalqları ədəbiyyatı: ənənələr və müasir tendensiyalar” mövzusunda beynəlxalq elmi konfransın iştirakçısı, Hindistanın Camiə Milliyə İslam Mərkəzi Universitetinin Xarici dillər departamentinin əməkdaşı dosent Nouşad bildirib.
Ölkəmizə ilk dəfə səfər etdiyini deyən hindistanlı qonaq Bakının gözəlliyinə və təmizliyinə heyran olduğunu söyləyib. O, bəzi tarixi yerləri, muzeyləri ziyarət etdiyini, Bakının qədimliyini qorumaqla müasir bir şəhərə çevrildiyini bildirib. Qeyd edib ki, burada qədim binalar müasir tikililərlə vəhdət təşkil edir.
Beynəlxalq tədbirin yüksək səviyyədə təşkilinə görə AMEA rəhbərliyinə təşəkkürünü bildirən dosent Nouşad vurğulayıb ki, bu konfrans bizə gələcəkdə birgə işləmək, əlaqələrimizi daha da möhkəmləndirmək baxımından böyük üstünlüklər verəcək.
