Gürcüstan Prezidenti Salome Zurabişvili Avropa Parlamentində çıxışı zamanı Avropanı, AB-ni Gürcüstandakı böhranın həllinə kömək etmək üçün mümkün qədər tez hərəkət etməyə çağırıb.
Axar.az xəbər verir ki, bu barədə gürcü mediası məlumat yayıb.
“Bu, Gürcüstan üçün həlledici vaxtdır. Biz özümüzü 1921-ci ildə hiss edirik”, - Zurabişvili bildirib.
Prezident deyib ki, biz vətəndaş qarşıdurmasına doğru gedirik:
“Amma bölünən xalq deyil... Bir tərəfdə Gürcüstan xalqı, digər tərəfdə isə hakimiyyətin repressiya aparatıdır”.
Zurabişvilinin sözlərinə görə, Gürcüstanın hakim partiyası ən azı 2019-cu ildən Rusiya yolu ilə gedir və bunun təzahürü “Qavrilovun gecəsi” olub.
O, hakimiyyətin qəsb edildiyini elan edərək, “seçkilərin xüsusilə mürəkkəb bir şəkildə saxtalaşdırıldığını" iddia edib.
Prezident AB-ni Gürcüstanda siyasi böhrandan çıxış yolu ola biləcək yeni seçkilərə nail olmaq üçün bütün mövcud rıçaqlardan istifadə etməyə çağırıb.
