Xorvatiya millisinin yarımmüdafiəçisi Luka Modriç Madrid “Real”ının heyətində ən çox mükafat qazanan futbolçu kimi klub tarixinə düşüb.
Arena.az xəbər verir ki, o, buna İspaniya nəhənginin heyətində FIFA Qitələrarası Kuboku qazanmaqla nail olub.
39 yaşlı futbolçunun madridlilərin heyətində əldə etdiyi mükafatların sayı 28-ə çatıb. Bununla da o, 27 mükafatı olan Dani Karvaxalı qabaqlayıb.
Xatırladaq ki, Luka Modriç 2012-ci ildən “Real”da çıxış edir. Xorvat futbolçu 2012-ci ilin avqustunda 35 milyon avro məbləğ müqabilində “Tottenhem”dən Madrid klubuna qoşulub. Modriçin İspaniya nəhəngi müqaviləsi 2025-ci ilin iyun ayının sonuna qədər qüvvədədir.
Veteran futbolçu cari mövsümdə “Real” üçün 24 oyun keçirib, 4 məhsuldar ötürmə verib.
Lukanın “qaymaqlılar”ın heyətində ümumi oyun statistikası isə göz oxşayır: 559 oyun, 39 qol, 90 məhsuldar ötürmə.
Modriç “Real”la dəfələrlə bütün mümkün əsas klub yarışlarında qalib olub. Lukanın “Real”la qazandığı qənimətlərə 6 UEFA Çempionlar Liqası, 5 FIFA Klub Dünya Kuboku, 5 UEFA Super Kuboku, 4 İspaniya La Liqası, 2 İspaniya Kral Kuboku, 5 İspaniya Super Kuboku və bir FIFA Qitələrarası Kubok daxildir. Həmçinin Modriç çoxsaylı fərdi mükafatların təltifçisidir. 28 qənimətlə Modriç “Real” tarixində ən zəngin futbolçudur.
Luka Modriç hazırda kapitanı olduğu, 2006-cı ilin martında debüt etdiyi Xorvartiya yığmasının heyətində 184 oyuna çıxıb, 27 qol vurub, 29 məhsuldar ötürmə verib.
“Transfermarkt” internet-portalı 39 yaşlı xorvat yarımmüdafiəçinin transfer dəyərini 6 milyon avro məbləğində qiymətləndirir.
