Bakı, TurkicWorld
Küveytdəki arxeoloji qazıntılar zamanı 7.000 ildən çox əvvələ aid və "yadplanetlilərə" bənzəyən heykəlciklər tapılıb.
TurkicWorld xəbər verir ki, uzun kəllə quruluşu və yastı burun kimi xüsusiyyətlərə malik olan bu heykəlciklər, Ubeyd mədəniyyəti ilə bağlı yeni anlayışlar ortaya qoyur.
Heykəllər Bəhra 1 arxeoloji bölgəsində tapılıb və bu ərazi 2009-cu ildən bəri Ərəbistan yarımadasındakı qədim Daş dövrü cəmiyyətləri haqqında ən mühüm araşdırma nöqtələrindən biri hesab edilir.
Qazıntılarda üzə çıxarılan kiçik, lakin incə işlənmiş gil heykəlciklərin Ubeyd mədəniyyətinə aid olduğu qeyd edilir. Bu mədəniyyət, Mezopotamiyadan Anadoluya və Ərəbistan yarımadasına qədər geniş bir sahəni əhatə edir. Daha əvvəl Mezopotamiyada oxşar heykəlciklər tapılsa da, Körfəz bölgəsində ilk dəfədir ki, belə tapıntılar aşkar olunur.
Varşova Universitetindən arxeoloq Piotr Bielinski, heykəlciklərin bu qədim icma üçün simvolik və ya ritualistik bir dəyər daşıya biləcəyini ifadə edib. Bəhra 1 bölgəsində tapılan gil heykəlciklər, Ubeyd mədəniyyətinin estetik və simvolik anlayışına dair yeni suallar yaradır.
Bundan əlavə, qazıntılar ərzində Ərəbistan yarımadasında istehsal olunan keramika növlərinin mənşəyi haqqında da mühüm məlumatlar əldə edilib. Bəhra 1-də, həmçinin, yerli olaraq istehsal olunan "Kobud qırmızı qab" adlı keramika və Mezopotamiyadan gətirilən Ubeyd keramika məmulatlarının ilk istehsal nöqtələrindən biri olduğu müəyyən edilib.
Təhlillər zamanı, yerli keramika gilində yabanı bitkilərin qalıqları və Ubeyd keramikasında isə arpa və buğda kimi kənd təsərrüfatı məhsullarının izləri tapılıb. Bu tapıntılar yalnız arxeoloji baxımdan deyil, həm də ekoloji tarix üçün böyük əhəmiyyət daşıyır. Keramika istehsalı üçün istifadə edilən bitki qalıqları, Ərəbistan yarımadasının flora müxtəlifliyi haqqında qiymətli məlumatlar verir.
Bu kəşflər, həm Ubeyd mədəniyyətinin bölgəyə təsirini, həm də yerli istehsal texnikalarını daha yaxşı anlamamıza kömək edir. Bəhra 1, Körfəz bölgəsindəki ən qədim keramika istehsalı mərkəzi olaraq, insanlıq tarixinin bu erkən dövrü ilə bağlı mühüm məlumatlar təqdim edir.
