Gürcüstanın Baş naziri İrakli Kobaxidze Prezident Salome Zurabişviliyə yeni parlament seçkilərinin təyin olunması ideyası ilə bağlı xəbərdarlıq edib.
O, bildirib ki, əks halda Zurabişvili cinayət məsuliyyətinə cəlb olunacaq.
"Report"un Gürcüstan mətbuatına istinadən verdiyi məlumata görə, Kobaxidze bu barədə brifinqdə bildirib.
Baş nazir bildirib ki, şənbə günü Zurabişvili parlament seçkiləri təyin etmək niyyəti ilə müxalifət və QHT nümayəndələri ilə görüşüb.
Kobaxidzenin sözlərinə görə, Gürcüstanda mövcud qanunvericiliyə əsasən, parlament seçkiləri üç halda təyin edilir: təkrar seçkilər, Mərkəzi Seçki Komissiyası və ya Konstitusiya Məhkəməsi əvvəlki seçkilərin nəticələrini ləğv etdikdə, dörd illik səlahiyyət müddəti başa çatanda və ya parlament hökumətə etimad göstərmədikdə.
Baş nazir vurğulayıb ki, əgər Prezident buna baxmayaraq başqa səbəbə görə yeni parlament seçkiləri təyin etmək qərarına gəlsə, o, buna görə cinayət məsuliyyətinə cəlb olunacaq.
"Onun (Zurabişvili - red.) harada, dəmir barmaqlıqlar arxasında və ya azadlıqda yaşamağa davam edəcəyini görəcəyik”, - Kobaxidze fikirlərini yekunlaşdırıb.
Xatırladaq ki, oktyabrın 26-da Gürcüstanda parlament seçkiləri keçirilib. Mərkəzi Seçki Komissiyasının yekun məlumatlarına görə, hakim “Gürcü arzusu - Demokratik Gürcüstan” Partiyası 53,93 % səslə qalib gələrək qanunverici orqandakı 150 yerdən 89-unu qazanıb.
