ADP İdarə Heyətinin növbəti toplantısı keçirilib

 

Moderator.az xəbər verir ki, toplantı iştirakçıları Qahirədə İnkişaf etməkdə olan səkkiz ölkənin İqtisadi Əməkdaşlıq Təşkilatının (D-8) sammiti zamanı Azərbaycanın bu təşkilata üzv seçilməsi məsələsinə münasibət bildirib. Partiya yetkililəri böyük iqtisadi potensiala malik “İslam Səkkizliyi” adlanan D-8-ə ölkəmizin yekdilliklə üzv seçilməsini təqdir edib və bu faktı ölkəmizin milli və strateji maraqlarına xidmət edəcəyinə əminliyini qeyd edib.

 

İdarə Heyəti Türkiyədə baş verən helikopter qəzası nəticəsində həlak olan insanların doğmalarına və bütövlükdə Türkiyə xalqına dərin hüznlə başsağlığı ünvanlayıb və həlak olanlara Allahdan rəhmət diləyib.

 

İdarə Heyəti Avropa Parlamentinin Azərbaycan hökumətinin vətəndaş cəmiyyətinə, müstəqil mediaya və siyasi müxalifətə qarşı repressiyalarını pisləyən, siyasi məhbusların azad edilməsini tələb edən və yüksək vəzifəli məmurlara qarşı hədəfli sanksiyaların tətbiqinə çağıran qətnamasinə münasibət bildirib. Partiya yetkililəri son zamanlar Qərb institutları ilə münasibətlərin gərginlik fazasına daxil olmasından dolayı Azərbaycana qarşı insan hüquq və azadlıqlarının pozulmasını özündə ehtiva edən bu cür qətnamələrin davamlı xarakter almasından narahatlığını ifadə edib və bu qərarların qərəzli, ya qərəzsiz olmasından asılı olmayaraq hakimiyyət yetkililərini ölkədə vətəndaş hüquq və azadlıqlarının qorunması, siyasi məhbusların azad edilməsi, media üzərində basqıların aradan qaldırılması istiqamətində addımlar atmağa və bu sahədə üzərinə götürdüyü beynəlxalq öhdəlikləri vicdanla yerinə yetirməyə çağırıb.

 

İdarə Heyəti Bəşər Əsəd dönəmindən sonra Suriyada baş verən hadisələr, ölkənin yenidən şəkillənməsində qardaş Türkiyənin bu ölkənin unitar yapısının, ərazi bütövlüyünün, suverenliyinin qorunması istiqamətində atdığı müsbət addımlar, İran rəsmilərinin yenə də Suriyanın daxili işlərinə müdaxilə xarakterli çağrışlar etməsi ilə bağlı məsələlər ətrafında müzakirə aparıb. Qeyd edilib ki, İranın ali dini rəhbəri Xomeneinin Suriyada formalaşan hökumətə qarşı müqavimət göstərilməsi ilə bağlı çağıışı bu ölkənin bu vaxta qədər Suriyada Əsəd rejimini dəstəkləməsinə, özgür Suriyanı öz vassalına çevirməsinə əyani sübutdur və bu cür çağırışlar beynəlxalq hüququn suverenlik prinsipi ilə ziddiyyət təşkil edir. Partiya rəsmiləri qardaş Türkiyənin Suriyanın yenidən qurulması istiqamətinə yönəlik dövlət siyasətinin önəmini qeyd edib və Azərbaycan hakimiyyətini qardaş ölkə ilə eyni xətti izləməyə çağırıb.

 

İdarə Heyəti Ukrayna-Rusiya müharibəsinə bir daha münasibət bildirib və dünya dövlətlərini bu qanlı müharibənin bitməsi üçün səylərini biləşdirməyə, barışın Ukraynanın birtərəfli qaydada sülhə zorlanması yolu ilə deyil, beynəlxalq hüquq normalarının ərazi bütövlüyü, suverenlik kimi ana prinsiplərinin rəhbər tutulması ilə əldə edilməsinə təsir imkanlarını artırmağa çağırıb.

 

İdarə Heyəti son vaxtlar ölkədə siyasi motivli həbs dalğasının genişlənməsindən, müxtəlif bəhanələrlə jurnalistlərin, aktiv siyasilərin həbsdə saxlanılmasından dolayı ölkəmizin demokratik ictimayyətin qınağına tuş gəlməsindən, Qərb institutlarının insan hüquqlarının pozulması ilə bağlı qəbul etdiyi qətnamələrlə üz-üzə qalmasından narahat olduğunu bildirib və dövlət başçısı İ.Əliyevi bir daha humanizm prinsiplərini, ölkədə milli birliyi, vətəndaş həmrəyliyini, vətəndaşların dövlətə bağlılıq dəyərlərini nəzərə alaraq qarşıdan gələn Dünya Azərbaycanlılarının Həmrəyliyi Günü münasibəti ilə əfv fərmanı imzalamağa çağırıb.