Görkəmli tədqiqatçı-alim, tanınmış Azərbaycan ədəbiyyatşünası, professor Asif Rüstəmli Gəncə Dövlət Universitetində ustad dərsi keçib.
Modern.az xəbər verir ki, “Cəfər Cabbarlının Cümhuriyyət dövrü yaradıcılığı və milli istiqlal hərəkatında yeri” mövzusuna həsr edilən ustad dərsində universitetin professor-müəllim heyəti və Filologiya fakültəsinin tələbələri iştirak ediblər.
GDU-nun Elm və innovasiyalar üzrə prorektoru, millət vəkili Pərvin Kərimzadə çıxış edərək professor Asif Rüstəmlinin elmi-pedaqoji fəaliyyəti barədə məlumat verib. Bildirib ki, tədqiqatçı alim Asif Rüstəmlinin ədəbi, elmi və publisistik yaradıclığının başlıca mərhələləri Azərbaycanın milli-ictimai və humanitar fikir tarixinin öyrənilməsinə, təhlilinə və təbliğinə həsr olunub. Prorektor onu da diqqətə çatdırıb ki, Asif Rüstəmli dramaturq Cəfər Cabbarlının bizə məlum olmayan dram əsərlərini, şeirlərini, publisistikasını tapıb üzə çıxarmış və ədibin əsərlərini bütövləşdirmişdir.
Çıxışlardan sonra professor Asif Rüstəmlinin “Cəfər Cabbarlının Cümhuriyyət dövrü yaradıcılığı və milli istiqlal hərəkatında yeri” mövzusunda mühazirəsi dinlənilib. Məruzəçi görkəmli dramaturq, istiqlal mücadiləsinin fəal üvlərindən biri Cəfər Cabbarlının Azərbaycan Xalq Cümhuriyyəti dövrü və sonrakı fəaliyyət sahələri, sovet rejiminə qarşı qeyri-leqal mübarizədə Milli İstiqlal Hərəkatına qoşulması və “İstiqlal” qəzetinin nəşri prosesində fəal iştirakı haqqında danışıb.
Sonda mövzu ərtafında tələbələrin sualları cavablandırılıb.
Qeyd edək ki, AMEA-nın Nizami Gəncəvi adına Ədəbiyyat İnstitutunun elmi işçisi, professor Asif Rüstəmli 14 kitabın, 350-dən çox elmi, publisistik məqalənin və məruzənin müəllifidir.
