Başqırdıstanda məhkəmə terror aktları və təxribat törətməkdə ittiham olunan 12 nəfərin işinə baxacaq. Bu barədə Lenta.ru-ya Rusiya İstintaq Komitəsinin Respublika üzrə İstintaq İdarəsinin rəisinin böyük köməkçisi Yevgeni Kanevski məlumat verib.
17 yaşdan 21 yaşadək olan gənclər hər birinin rolundan və iştirak dərəcəsindən asılı olaraq təxribat təşkil etməkdə və həyata keçirməkdə, onu törətməyə cəhddə, terror aktı törətməyə hazırlaşmaqda, terror fəaliyyətinə şərait yaratmaqda, cinayət törətmək məqsədi ilə təlim keçməkdə ittiham olunurlar.
İdarənin məlumatına görə, 2022-ci ildə müttəhimlərdən biri internetdə naməlum şəxslə tanış olub və pul müqabilində Rusiya dəmir yollarında silsilə yanğınlar və partlayışlar törətməyə hazır olan vətəndaşları tapmağa razılaşıb. Oktyabrdan noyabr ayına kimi o, Başqırdıstandan yeddi və Krasnodar diyarının iki sakinini tapıb. Onlar 9 transformatora od vurublar. Başqırdıstanda 5, Krasnodar yaxınlığında isə 1 obyektə ziyan dəyib.
Bundan əlavə, 2022-ci ilin sentyabr-noyabr aylarında iki azyaşlı Oktyabrskidəki hərbi komissarlığı partlatmaq üçün əldəqayırma partlayıcı hazırlayıblar. FSB əməkdaşları cinayətkar qrupun fəaliyyətini dayandırmağa və təqsirləndirilən şəxsi saxlamağa nail olublar. Hazırda onların işi məhkəməyə verilib.
Oxuməni.az
