Bakı, 12 iyul, AZƏRTAC
Kişi voleybolçulardan ibarət Azərbaycan millisi Avropa çempionatının təsnifat mərhələsinə hazırlıqlara start verib.
Azərbaycan Voleybol Federasiyasının mətbuat xidmətindən AZƏRTAC-a verilən məlumata görə, yığmanın baş məşqçisi Fərid Cəlalov təlim-məşq toplanışına 16 idmançı cəlb edib.
Məşqlər gündə iki dəfə olmaqla Gənclər və İdman Nazirliyinin Voleybol Mərkəzində təşkil olunur. Təlim-məşq toplanışı çərçivəsində yoxlama oyunlarının keçirilməsi də nəzərdə tutulub.
Qeyd edək ki, milli komanda təsnifat mərhələsinin ilk matçını avqustun 17-də səfərdə Avstriya seçməsinə qarşı keçirəcək. Voleybolçular bir həftə sonra Bakıda Belçika kollektivini qəbul edəcəklər. Təsnifat mərhələsinin formatına uyğun olaraq növbəti iki qarşılaşma 2025-ci ilin avqustunda baş tutacaq.
Seçmə mərhələdə 21 yığma komanda 7 qrupda mübarizə aparacaq. Seçmə mərhələnin yekununda qrup qalibləri və 5 ən yaxşı qrup ikincisi olacaq kollektivlər Avropa çempionatında iştirak hüququ qazanacaqlar.
