Moldova öz ərazisində Ukrayna üçün F-16 qırıcılarını yerləşdirməyə hazırlaşmır.
Redaktor.az TASS-a istinadla xəbər verir ki, bu barədə respublikanın Xarici İşlər Nazirliyi məlumat yayıb.
Bildirilib ki, Moldovanın Moskvadakı səfirliyinin müvəqqəti işlər vəkili bu gün günortadan sonra “Moldovanın Ukrayna üçün F-16 təyyarələrini yerləşdirmək niyyəti haqqında” mətbuatda yayılan xəbərlərə görə Rusiya Xarici İşlər Nazirliyinə çağırılıb.
Moldova Xarici İşlər Nazirliyinin teleqram kanalında dərc edilmiş bəyanatda deyilir:
“Moldova silah və hərbi texnika, o cümlədən Ukrayna üçün nəzərdə tutulan təyyarələri qəbul etmir və qəbul etməyəcək”.
Qeyd edilir ki, “Ukrayna Silahlı Qüvvələri üçün nəzərdə tutulan təyyarələrin yerləşdirilməsi ilə bağlı məlumatlar həqiqətə uyğun deyil” və bu barədə sosial şəbəkələrdə yayılan xəbərlər saxtadır. XİN Moldovanın neytral dövlət olduğunu və onun rəhbərliyinin bundan sonra da neytrallıq prinsipinə sadiq qalacağını vurğulayıb.
Turan İSMAYIL
