“Turan Tovuz”un futbolçusu Ayxan Hüseynov artıq üçüncü ildir legioner statusu ilə oynayır.
Rusiyada doğulmasına baxmayaraq, əslən Azərbaycandan olan yarımmüdafiəçi heç cür yerli vətəndaşlıq ala bilmir.
Məsələ ilə bağlı aidiyyəti qurumlara müraciət olunsa da, yekun nəticə hasil olmayıb.
Deyilənə görə, çıxılmaz vəziyyətə düşən Hüseynov problemin həlli üçün vəkilə müraciət edib ki, ən qısa zamanda Azərbaycan pasportuna sahiblənsin.
Sportinfo.az-a açıqlama verən səbəbkar məsələ ilə bağlı bunları deyib:
“Vəkil tutmağımla bağlı yazılanlar həqiqəti əks etdirmir. Ümumiyyətlə, belə bir planım olmayıb.
Nə baş verdiyini özüm də başa düşə bilmirəm. Heç bir məlumat verilmir. Lazımi orqanlara müraciət olunub. Lakin məsələ həllini tapmır. Artıq nə edəcəyimi bilmirəm”.
“Zenit”in yetirməsi olan 25 yaşlı futbolçu ölkədaxili yarışlarda məhz legioner limitinə görə əsas heyətdə möhkəmlənməkdə çətinlik çəkir.
HƏBİB
