İspaniya yığmasının keçmiş yarımmüdafiəçisi David Silva “Barselona”nın 17 yaşlı yeniyetmə hücumçusu Lamin Yamal haqda fikrini paylaşıb.
Arena.az keçmiş futbolçunun bu barədə fikrini təqdim edir:
“Yamalın bugünkü oyun tərzi heç kimə bənzəmir. O, çox gənc oyunçudur, amma böyük üstünlüklə oynayır. Ümid edək ki, bu, belə də qalacaq, çünki o, futbol tarixinin ən yaxşılarından biri olmaq üçün bütün imkanlara malikdir. Belə bir səviyyəni saxlamağın son dərəcə çətin olduğu məlum olsa da, Yamalın böyük istedadı və görkəmli qabiliyyətləri var”, deyə David Silva bildirib.
Lamin Yamal “Barselona”nın yetirməsidir. İstedadlı yeniyetmə 2022/2023-cü illər mövsümündən Kataloniya təmsilçisinin əsas komandasında çıxış edir. Yamalın “Barselona” ilə müqaviləsi 2026-cı ilin iyun ayının sonuna qədər qüvvədədir.
Cari mövsümdə Yamal “blauqrana”nın heyətində bütün yarışlarda 9 oyuna 5 qol və 5 məhsuldar ötürmə ilə fərqlənib.
Yamalın “Barselona”da çıxışının ümumi mənzərəsi 60 oyun, 12 qol və 14 məhsuldar ötürmədən ibarətdir.
Yamal 2023-cü ilin sentyabrında debüt etdiyi İspaniya yığmasının heyətində 16 oyun keçirib, 3 qol vurub, 9 məhsuldar ötürmə verib.
Lamin Yamalın qənimətlər muzeyində “Barselona” ilə 2022/2023-cü illər mövsümündə qazandığı İspaniya La Liqası var. Həmçinin Yamal İspaniya yığması ilə AÇ-2024-ün qalibi olub.
“Transfermarkt” internet-portalı 17 yaşlı ispaniyalı cinah hücumçusunun transfer dəyərini 120 milyon avro məbləğində qiymətləndirir.
