Livanın Səhiyyə Nazirliyi yanında Təcili Əməliyyatlar Mərkəzi İsrailin Beyrutdan 75 km cənubda yerləşən Nəbatiyyə şəhərinə endirdiyi zərbə nəticəsində dinc əhalinin həlak olması ilə bağlı məlumat yayıb.
Bakupost.az TASS-a istinadən xəbər verir ki, məlumatda ölənlərin sayının 6-dan 16-ya, yaralıların sayı isə 43-dən 52-yə yüksəldiyi bildirilir.
Ölənlərin əksəriyyətinin cəsədləri xilasedicilər tərəfindən şəhərin mərkəzi hissəsində dağılmış binaların dağıntılarını təmizləyərkən aşkar edilib. Nəbatiyyə şəhərinin meri Əhməd Xeyl və bələdiyyə şurasının beş üzvü öldürülüb.
Respublikanın baş naziri Nəcib Mikati İsrailin Livanın cənubunda dinc əhaliyə qarşı törətdiyi yeni cinayətdən qəzəbləndiyini bildirib və BMT Təhlükəsizlik Şurasından müharibəni dayandırmağı tələb edib. Onun sözlərinə görə, bu aqressiv aksiya “beynəlxalq ictimaiyyətin İsrailin vəhşiliklərinə qəsdən susması və onu öz qanunsuz hərəkətlərini davam etdirməyə təşviq etməsi səbəbindən mümkün olub”.
Zaur, BakuPost
