Qalib Azərbaycan qazandığı möhtəşəm uğurlar və yaratdığı yeni reallıqlarla bu gün dünyanın diqqət mərkəzindədir. Bu kontekstdə, Prezident İlham Əliyevin rəhbərliyi ilə həyata keçirilən məqsədyönlü siyasət milli maraqlara və beynəlxalq hüququn normalarına əsaslanmaqla bərabər, bəşəriyyəti düşündürən, xalqlar və dövlətlər üçün olduqca aktual çağırışlara da adekvat cavab verir. Yaşıl enerji gündəliyi əsasında iqlim dəyişikliyinə qarşı qlobal mübarizə sahəsində ardıcıl fəaliyyətin həyata keçirilməsi də bu kontekstdə xüsusi qeyd edilməlidir.
AZƏRTAC xəbər verir ki, bu fikirləri oktyabrın 26-da Bakıda keçirilən "Yaşıl dünya naminə həmrəylik ili"nə həsr olunmuş ümumrespublika "Nə? Harada? Nə zaman?" intellektual oyununun bağlanış mərasimində Yeni Azərbaycan Partiyası (YAP) Sədrinin müavini - Mərkəzi Aparatın rəhbəri Tahir Budaqov bildirib.
Hər ilin aktual gündəliyinə həsr olunan və 2022-ci ildən başlayaraq ənənə halını almış bu bilik yarışmasının gənclərin potensialının üzə çıxarılmasına geniş imkanlar yaratdığını bildirən YAP Sədrinin müavini qeyd edib ki, builki ümumrespublika tədbiri də məhz bu amala xidmət edir.
“Məlumat verildiyi kimi, 85 komandanın iştirakı ilə keçirilən və 22 qalib komandanın final mərhələsində I-III yerlər uğrunda mübarizə apardığı bu intellektual yarışmada gənclərimiz ətraf mühitin mühafizəsi və ekoloji tarazlığın təmini istiqamətində həyata keçirilən dövlət siyasətinə - Ümummilli Lider Heydər Əliyevin və Prezident İlham Əliyevin rəhbərliyi ilə bu sahədə görülmüş işlərə, o cümlədən yaşıl enerji konsepsiyası əsasında reallaşdırılan tədbirlərə dair çoxsaylı sualları cavablandırmağa çalışıblar. İnanırıq ki, bu tədbir onlar arasında kommunikasiyanın gücləndirilməsi və komanda şəklində birgə çalışmaq bacarıqlarının yüksəldilməsinə daha bir töhfə olacaq”, - deyə T.Budaqov əlavə edib.
