Polşa “Şərq qalxanı” proqramı çərçivəsində Rusiya ilə sərhəddə müdafiə istehkam xəttinin tikintisinə başlayıb.
"Unikal" "Euronews"a istinadən xəbər verir ki, bu barədə ölkənin baş naziri Donald Tusk bildirib.
“Şərq Qalxanı” Müdafiə Nazirliyi və Polşa Ordusunun Baş Qərargahı tərəfindən hazırlanmış və təxminən 800 km uzunluqda Polşanın Rusiya və Belarusla sərhədlərində müxtəlif növ istehkamların, relyef maneələrinin və hərbi infrastrukturun tikintisini nəzərdə tutan proqramdır. Layihənin təqdimatı bu ilin may ayında keçirilib.
Baş nazirlikdən verilən açıqlamaya görə, “hökumət Belarus və Rusiyadan gələn təhdidlərə qarşı qorunmaq üçün NATO-nun şərq cinahında hərtərəfli müdafiə infrastrukturunun qurulmasına sadiqdir”.
“Şərq Qalxanı” proqramı, xüsusilə, əsas sərhəd bölgələrində istehkamların tikintisini və yerdə təbii maneələrin yaradılmasını nəzərdə tutur. Xüsusilə, sərhəd zonasında arxların qazılması, mina sahələrinin yerləşdirilməsi və tank əleyhinə kirpilərin quraşdırılması nəzərdə tutulur.
O, həmçinin müvafiq kəşfiyyat və təhlükənin aşkarlanması sistemlərinin, irəli bazaların, logistika qovşaqlarının, anbarların tikintisini və ya pilotsuz uçuş əleyhinə müdafiə sistemlərinin yerləşdirilməsini nəzərdə tutur.
Məqsəd, bir tərəfdən, Polşa ordusunun sərhədi müdafiə etməsini mümkün qədər asanlaşdırmaq, digər tərəfdən isə potensial təcavüzkarın ölkə ərazisinə keçməsini çətinləşdirməkdir.
Polşanın şərq və şimal sərhədləri boyunca istehkamların tikintisi Pomeraniya, Varm-Masuriya, Lyublin, Podlaskie və Podkarpaket voyevodalıqlarını əhatə edəcək.
Nuranə Abbasova
