İsrail oktyabrın sonunda İrana hücumu nəticəsində Tehrandan 32 km cənub-şərqdə İranın Parçin hərbi kompleksində fəaliyyət göstərən çox məxfi nüvə silahı tədqiqat mərkəzini məhv edib. Bu barədə “Axios” üç amerikalı məmura, bir hazırkı İsrail rəsmisinə və bir keçmiş İsrail rəsmisinə istinadən məlumat yayıb. Peyk görüntülərinə görə, iki bina dağılıb.
Keçmiş İsrail rəsmisi bildirib ki, zərbə nüvə qurğusunda uranı əhatə edən və onun partlatılması üçün lazım olan plastik partlayıcıların hazırlanması üçün istifadə edilən mürəkkəb avadanlıqları məhv edib.
“Axios” mənbələri dağıdılmış tədqiqat obyektinin nüvə silahı hazırlamaq üçün istifadə edildiyini, lakin mülki tədqiqat kimi görünmək üçün qurulduğunu söyləyib.
Tədqiqat mərkəzi 2003-cü ildə İranın nüvə proqramının rəsmi sona çatmasından bəri fəaliyyətsiz hesab olunurdu, lakin bu il ABŞ və İsrail kəşfiyyatı orada yeni fəaliyyət əlamətləri barədə məlumat verməyə başladı. “Bu, çox gizli idi. İran hökumətinin yalnız kiçik bir hissəsi bu barədə bilirdi, lakin əksəriyyəti heç nə bilmirdi”, - ABŞ rəsmisi “Axios”a bildirib.
"Zərbə, hətta çox məxfi saxlanılan və İran hökumətindəki çox kiçik bir qrup adama məlum olan şeylərə gəldikdə belə, israillilərin İran sistemi haqqında əhəmiyyətli biliyə malik olduğuna dair o qədər də incə olmayan bir işarə idi," o deyib.
Almaz Həsənli
