Maykl Saylorun "MicroStrategy Inc."də (MSTR) nağd pul əvəzinə bitcoin (BTC-USD) saxlamaq qərarı bu əvvəllər az tanınan proqram təminatı şirkətini ən zəngin korporasiyalar sırasına çıxarıb.
Valyuta.az-ın "Yahoo Finance"a istinadən verdiyi məlumatına əsasən, Virciniya ştatının Tysons Corner şəhərində yerləşən "MicroStrategy"nin təxminən 26 milyard dollarlıq bitcoin ehtiyatı, "IBM", "Nike" və "Johnson & Johnson" kimi qlobal şirkətlərin nağd və qiymətli kağız ehtiyatlarını üstələyir. Bu göstərici ilə yalnız "Apple Inc." və "Alphabet Inc." kimi iri şirkətlər "MicroStrategy"ni qabaqlayır.
Saylor 2020-ci ildə inflyasiyaya qarşı tədbir kimi və şirkətin gəlirlərinin azalmasını kompensasiya etmək üçün "Bitcoin"ə sərmayə yatırmağa başlayıb. Əvvəlcə əməliyyat gəlirlərini istifadə edən şirkət, daha sonra səhm və borc satışları ilə maliyyə gücünü artıraraq daha çox "Bitcoin" alıb. Bunun nəticəsində "MicroStrategy" kriptovalyuta sahəsində ən böyük korporativ sahib olub.
Ənənəvi idarəçilik ekspertləri bu yanaşmaya skeptik baxsalar da, investorlar üçün "Bitcoin"in qiymət artımından faydalanmağın yeni bir yolu yaranıb. Şirkətin səhmlərinin dəyəri 2020-ci ildən bəri 2,500%-dən çox artıb, bitcoin isə təxminən 700% bahalaşıb. Çərşənbə günü bitcoin yeni rekorda imza ataraq 93,500 dollar səviyyəsinə çatıb.
“Onların balansı əsasən "Bitcoin"in qiymətindən asılıdır,” deyə "Zion Research Group"un təsisçisi Deiv Zion qeyd edib. “Onlar qiymətə nəzarət edə bilmədikləri üçün bu dalğa ilə hərəkət etməlidirlər, bu dalğa isə həm qalxa, həm də düşə bilər.”
Əksər şirkətlər maliyyə aktivlərini biznesi dəstəkləmək və ya dividend ödəmək üçün istifadə edir. Lakin Saylor, "MicroStrategy"nin dividend ödəməməsinə baxmayaraq, səhmdarların bu strategiyadan fayda gördüyünü bildirib.
Şirkət "Bitcoin" gəlirliyini ölçən "bitcoin gəliri" göstəricisi tətbiq edib. Bu ilin əvvəlindən göstərici 26.4% təşkil edir. Saylorun sözlərinə görə, əsas məqsəd "Bitcoin" volatilliyini sataraq gəlir əldə etmək və onu yenidən "Bitcoin"ə yatırmaqdır.
Saylor yaxın üç ildə 42 milyard dollar toplamaq niyyətindədir. "MicroStrategy"nin ümumi bitcoin alışı təxminən 11.9 milyard dollara başa gəlib.
"Benchmark Co." analitiki Mark Palmer bu strategiyanı dəstəkləyir və şirkətin səhmlərinə "al" reytinqi verib. “2024-cü ildə bitcoin-in dəyərindəki artım fonunda bu yanaşmadan uzaqlaşmaq üçün səbəb yoxdur,” deyə Palmer bildirib.
"TD Cowen" analitiki Lans Vitanza isə bu strategiyanın əvvəlcə müdafiə məqsədi daşıdığını, lakin indi səhmdar dəyərini artırmaq üçün istifadə edildiyini vurğulayıb.
Rəhim
