Əgər su ilə bağlı heç bir tədbir görülməsə, bu, 2050-ci ilə qədər qlobal ÜDM-nin 8-15 faizi həcmində itkilərə səbəb ola biləcək çox mənfi iqtisadi nəticələrə gətirib çıxara bilər.
APA xəbər verir ki, bunu COP29 çərçivəsində “İqlim üçün Su: Su həllərinin NDC və NAP-lara inteqrasiyası. Biomüxtəliflik, su ehtiyatları və iqlim əlaqəliliyi" mövzusunda yüksək səviyyəli dəyirmi masada Niderlandın Xarici İşlər Nazirliyinin dayanıqlı inkişaf üzrə səfiri və inklüziv yaşıl böyümə direktoru Vampi Libon bildirib.
“Əgər su ilə bağlı heç bir tədbir görülməsə, bu, 2050-ci ilə qədər qlobal ÜDM-nin 8-dən 15 faizə qədər itkilərə səbəb ola biləcək çox mənfi iqtisadi nəticələrə gətirib çıxara bilər. Bu ssenarinin qarşısını almaq üçün biz suyu daha səmərəli, ədalətli və dayanıqlı istifadə etməyə başlamalıyıq. Bizim fikrimizcə, su iqlim siyasətində mərkəzi yer tutmalıdır və birgə fəaliyyət göstərmək vacibdir. Təxminən 90 faiz ölkə artıq öz milli planlarına su ilə bağlı uyğunlaşma tədbirlərini daxil edib. Lakin bu öhdəliklərin maliyyələşdirilməsi problemi hələ də həll edilməyib. Bu, bütün maraqlı tərəflərin kollektiv səylərini tələb edən əsas vəzifədir. Xoşbəxtlikdən, su məsələlərinə diqqət artır və tərəfdaşlar həll yolları üzərində işləməyə hazırdırlar. Niderlandda biz su ehtiyatlarının idarə edilməsinin bütün aspektlərini yaxşı başa düşürük və ortaya çıxan çağırışlarla necə mübarizə aparmağı bilirik. Biz əməkdaşlığa, bir-birimizdən öyrənməyə və birgə işləməyə hazırıq. İnvestisiyaların cəlb edilməsinə, potensialın inkişafına və bilik mübadiləsinə kömək edə bilərik, çünki bu, olduqca vacibdir”, - o qeyd edib.
