Hazırda ən böyük məqsədlərdən biri Qərbi Azərbaycana qayıdışdır.
Bunu Milli Məclisdə yaradılan Qərbi Azərbaycana Qayıdış üzrə Təşəbbüs Qrupunun üzvü, deputat Səbinə Salmanova “Sumqayıtın inkişafında qərbi azərbaycanlıların rolu” mövzusunda keçirilən tədbirdə deyib.
"XX əsrin əvvəllərindən başlayaraq müxtəlif dövrlərdə soydaşlarımız Qərbi Azərbaycandan məcburi şəkildə deportasiya edilib, etnik təmizləmə siyasəti nəticəsində öz doğma yurdlarını tərk etmək məcburiyyətində qalıblar. Deportasiya insanlıq əleyhinə cinayətdir. Ermənistan qərbi azərbaycanlılara qarşı insanlıq əleyhinə cinayət törədib", - o qeyd edib.
Deputat xatırladıb ki, Azərbaycan Prezidenti İlham Əliyev dəfələrlə beynəlxalq tribunalarda bu tarixi ədalətsizliyə diqqət çəkib və qərbi azərbaycanlıların hüquqlarının bərpasını tələb edib:
"Dövlət başçısının bu məsələdəki qətiyyətli mövqeyi beynəlxalq hüququn norma və prinsiplərinə əsaslanır. Prezidentin söylədiyi kimi, biz Qərbi Azərbaycana sülh yolu ilə qayıdacağıq. Ermənistan başa düşməlidir ki, Azərbaycanın ona qarşı hər hansı bir ərazi iddiası yoxdur. Biz, sadəcə, onlardan beynəlxalq hüququn norma və prinsiplərinə uyğun olaraq soydaşlarımızın dədə-baba torpaqlarına qayıdışının təhlükəsiz və ləyaqətli şəkildə təmin olunmasını tələb edirik. Ermənistan hökuməti həmçinin dədə-baba torpaqlarına qayıdacaq azərbaycanlıların mülkiyyət hüquqlarını bərpa etməli, onların evlərini, icma torpaqlarını da qaytarmalıdır".
