Ukraynada müharibə kritik mərhələyə çatıb. Yeni seçilmiş prezident Donald Trampın vəzifəyə başlamasından sonra ABŞ-ın Ukraynaya dəstəyini davam etdirib-etdirməyəcəyi sual doğurur.
Qaynarinfo xəbər verir ki, Ukrayna prezidenti Volodimir Zelenskinin "Kyodo News” agentliyinə verdiyi müsahibəyə görə, Tramp və onun komandası Ukraynanın mövqeyini və "qələbə planını" bilir. Bu plan Ukraynanın danışıqlar masasında "güclü mövqeyə" malik olmasına yönəlib.
"Onlar planı öyrənirlər və biz onları eşidəcəyik. Amma Ukraynanın kapitulyasiyası olmayacaq. Bu bir faktdır və düşünürəm ki, o bunu anlayır", – deyə Zelenski vurğulayıb.
Prezident, ABŞ-ın yeni seçilmiş prezidenti ilə əlavə danışıqlara ümid etdiyini və "bəzi məsələləri daha ətraflı izah etmək" istədiyini qeyd edib.
Daha əvvəl "Politico” bildirib ki, Ukrayna prezidenti Volodimir Zelenski yeni seçilmiş ABŞ prezidenti Donald Trampla uğurlu diplomatik taktika qurub. Məqalədə vurğulanıb ki, Kiyev Ağ Evdə yeni rəhbərliklə toqquşmadan qaçmaq üçün öz yanaşmasını dəyişməli olduğunu anlayır.
Bundan əlavə, NATO-nun baş katibi Mark Rutte bildirib ki, Alyans və Tramp Rusiya diktatoru Vladimir Putini danışıqlar masasına əyləşməyə razı salacaq. Onun sözlərinə görə, Ukrayna hələlik danışıqlar üçün güclü mövqeyə malik deyil.
Alpər
