Rusiya KTMT ilə bağlı öhdəliklərini yerinə yetirməyən Ermənistanı təşkilatdan çıxarmaqla hədələyir.
Moderator.az Teleqraf.com-a istinadən xəbər verir ki, bu barədə “Past” yazır.
Rusiya Xarici İşlər Nazirliyinin sözçüsü Mariya Zaxarova dünən bildirib ki, təşkilatın maliyyə öhdəliklərini yerinə yetirməyən KTMT üzvləri səsvermə hüququndan məhrum edilə bilərlər.
Təşkilat çərçivəsində Ermənistan ətrafında yaranmış vəziyyəti şərh edən Zaxarova qeyd edib ki, iki il ərzində yığılan borc qeyd olunan vəsait üçün əsas ola bilər: “Rusiya KTMT-nin büdcəsinin yarısını təmin edir, digər iştirakçılar isə hər biri 10 faiz ödəyir. Ödənişlərdən imtina və ya gecikdirmə forması yoxdur. Cari ildə köçürülməmiş məbləğlər borca çevrilir”.
Zaxarovanın sözlərinə görə, üzv dövlət iki il müddətində yığılmış borcunu ödəməsə, KTMT-də səsvermə hüququndan məhrum edilə bilər.
“Past” vurğulayır ki, belə bir halla üzləşmiş Ermənistanın KTMT-dən çıxarılması durumu yaranıb:
“2022-ci ildən sonra Ermənistanın KTMT ilə problemləri var. İrəvan borclarını ödəməyəcəyini aylar əvvəl bəyan edib. Amma Zaxarovanın bu hədəsi Ermənistan hakimiyyətinin əhval-ruhiyyəsinə qətiyyən təsir göstərməyəcək. Əksinə, Paşinyan və komandası cidd-cəhdlə çalışır ki, KTMT-nin özü Ermənistanın çıxarılması barədə qərar qəbul etsin.
Paşinyan və komanda yoldaşlarının açıqlamaları sübut edir ki, geriyə yol yoxdur. Bir neçə gün əvvəl Paşinyanın özü də bəyan eləmişdi ki, biz artıq özümüzü KTMT-dən kənarda hesab edirik, qoy onlar nə istədiklərinə qərar versinlər”.
