Suriya həbsxanasının keçmiş rəisi işgəncə və sui-qəsddə ittiham olunur
Musavat.com xəbər verir ki, ABŞ səlahiyyətliləri, keçmiş Suriya məmuru, Adra həbsxanasının keçmiş rəhbəri Samir Osman Əl-Şeyxi işgəncə və sui-qəsd cinayətlərində ittiham edib. Əl-Şeyx 2005-2008-ci illərdə (devrilmiş prezident Bəşər Əsədin rejimi dövründə) həbsxanaya rəhbərlik edib və ittihamlara görə, bu müddət ərzində məhbuslara ağır fiziki və psixoloji işgəncələr verilməsini təşkil edib.
"Green Card" müraciəti
Departament bildirib ki, Əl-Şeyxi daha sonra ABŞ-dan “yaşıl kart” (Green Card) və ya yaşayış icazəsi almaq üçün etdiyi cinayətlər barədə yalan danışıb.
Qeyd edilir ki, Əl-Şeyx Suriya polisi və dövlət təhlükəsizlik aparatında yüksək vəzifələr tutub. O həmçinin hakim Suriya Baas Partiyası ilə əlaqədə olub və 2011-ci ildə Əsəd tərəfindən Deyr əz-Zur əyalətinin qubernatoru təyin edilib.
Əl-Şeyxin 2020-ci ildə ABŞ-a mühacirət etdiyi və 2023-cü ildə vətəndaşlıq üçün müraciət etdiyi iddia edilir.
ABŞ-a səfər...
Samir Osman Əl-Şeyx iyul ayında Los-Anceles Beynəlxalq Hava Limanında saxlanılıb. O, viza və vətəndaşlıq ərizələrində Suriyada heç kimə təqib və ya işgəncə vermədiyini iddia etsə də, bu məlumatların yalan olduğu müəyyən edilib. Federal rəsmilərin açıqlamalarına görə, 72 yaşlı keçmiş məmur Los-Ancelesdən Livana yola düşmək istəyərkən saxlanılıb.
Adra həbsxanasının dəhşətləri
Federal ittihamnamədə Əl-Şeyx məhbuslara ağır cəzalar tətbiq etməkdə birbaşa iştirak etməkdə və tabeliyində olanlara işgəncə əmrini verməkdə günahlandırılır. İddialara görə, o məhbusları "işgəncə qanadına" göndərib. Burada məhbuslar döyülüb, əlləri tavandan asılıb və bəzən onurğa sınıqlarına səbəb olan xüsusi cihazlarla əzab çəkiblər.
Departament bildirib ki, işgəncə Suriyanın devrilmiş prezidenti Bəşər Əsəd rejiminə qarşı müxalifətin qarşısını almaq məqsədilə olub.
Əl-Şeyxin vəkili Nina Marino isə müvəkkilinin günahsız olduğunu bildirib. Onun sözlərinə görə, bu ittihamlar siyasi motivlidir və ABŞ hökuməti xarici vətəndaşa qarşı əsassız cinayət işi açıb.
Əl-Şeyxdən əlavə, ABŞ səlahiyyətliləri Suriyanın digər iki məmurunu da Dəməşqdəki Mezzeh aviabazasında işgəncə və həbs mərkəzi idarə etməkdə ittiham edib. İddialara əsasən, qurbanlar arasında suriyalılar, amerikalılar və ikili vətəndaşlar, o cümlədən 26 yaşlı amerikalı yardım işçisi Layla Şveykani də olub.
Sərt cəzalar gözlənilir
Əl-Şeyxin günahı sübut olunarsa, o, işgəncə etmək üçün sui-qəsd ittihamına görə 20 il, immiqrasiya fırıldaqlarına görə isə hər bir maddə üzrə 10 il həbs cəzası ala bilər.
Mənbə: https://www.reuters.com/
Musavat.com
