"Sevilya"nın əfsanəsi Xesus Navas "Ramon Sançes Pisxuan"da son matçını keçirib.
İdman.biz xəbər verir ki, 39 yaşlı futbolçu "Selta" ilə görüşdə 71 dəqiqə meydanda olub.
Sevilyalılar doğma azarkeşlər qarşısında vida matçında Navasa 1:0 hesablı qələbə hədiyyə ediblər. Xesusun "Sevilya" karyerası 2000-ci ildə 15 yaşında "Sevilya"nın yeniyetmə komandasının formasını geyinməklə başlayıb. O, Andalusiya təmsilçisinin heyətində bir çox uğurlara imza atıb. 4 dəfə UEFA/Avropa Liqası kubokunu qazanan Navas iki dəfə İspaniya kuboku və Superkuboku titullarına sahib çıxıb.
2013-2017-ci illərdə "Mançester Siti"nin şərəfini qoruyan Xesus İngiltərə çempionu titulunu qazanıb. O, DÇ-2010, AVRO-2012 və AVRO-2024 turnirlərində qalib olub.
Qeyd edək ki, dekabrın 30-da "Ramon Sançes Pisxuan"da Xesus Navasın vida tədbiri keçiriləcək.
İdman.biz
