2002-ci ildə Avropa poliomielitdən azad elan olunsa da, Almaniya, Polşa və İspaniyanın tullantı sularında poliovirus aşkar edilməsi narahatlıq doğurub. Səhiyyə orqanları, bu vəziyyətin peyvənd boşluqları səbəbindən yoluxma riskini artırdığını bildirib.
AZƏRTAC “euronews.com” saytına istinadla xəbər verir ki, Polşada biryaşlı uşaqların 85 faizi, Almaniyada 91 faizi, İspaniyada isə 93 faizi poliomielitə qarşı peyvənd olunub. Polşadakı aşağı göstəricilər virusun yayılma riskini artırır. Ümumdünya Səhiyyə Təşkilatı (ÜST) və Avropa Xəstəliklərin Qarşısının Alınması və Nəzarəti Mərkəzi (ECDC) 2012-2021-ci illərdə Avropa İttifaqında 2,4 milyon uşağın peyvənd olunmadığını qeyd edir.
Poliovirus kanalizasiya sularında, peyvənd olunmuş şəxslərin nəcisində də aşkar edilə bilər. Bu, virusun zəifləmiş formasının oral peyvənd vasitəsilə yayılması ilə əlaqədardır. Lakin virus kifayət qədər uzun müddət yayılsa, daha güclü ştama çevrilə bilər. Bu vəziyyət Pakistan və Əfqanıstan kimi endemik bölgələrdən səyahət edən peyvənd olunmamış şəxslər vasitəsilə də baş verə bilər.
Almaniya, Polşa və İspaniyada tullantı sularının nəzarət proqramları genişləndirilib. Polşa uşaqların peyvənd olunmasını təşviq edir, Almaniya isə tibbi klinikalarda pulsuz testlər təklif edir. Mütəxəssislər infeksiyanın qarşısını almaq üçün əhalinin ən az 80 faizinin, uşaqların isə 95 faizinin peyvənd olunmasının vacib olduğunu bildirir.
Pakistan və Əfqanıstanda poliomielit halları yenidən artıb. 2024-cü ildə Pakistanda 55, Əfqanıstanda 23 yoluxma hadisəsi qeydə alınıb. Qəzza zolağında isə 25 ildən sonra ilk dəfə körpədə poliomielit aşkar edilib. Bu hadisə ÜST-nin müdaxiləsi ilə bölgədə genişmiqyaslı peyvənd kampaniyasına səbəb olub.
ÜST sözçüsü Oliver Rosenbauer, poliovirusun peyvəndlə tam aradan qaldırılmayana qədər dünyada yayılmağa davam edəcəyini bildirib. Mütəxəssislər Avropa ölkələrini peyvənd proqramlarını gücləndirməyə və tullantı sularına nəzarəti gücləndirməyə çağırırlar.
