ABŞ Dövlət Departamentinin Antiqlobal Korrupsiya Çempionu elan etdiyi Abzas Media nəşrinin baş redaktoru Sevinc Vaqifqızı İstintaq Təcridxanasından ictimaiyyətə müraciət göndərib. O, demokratik dəyərlərə sadiqliklərinə görə onları mükafata layiq görənlərə minnətdarlığını bildirib.
Vaqifqızı qeyd edir ki, Abzas Media-nın jurnalistləri Azərbaycanda yüksək vəzifəli şəxslərin korrupsiya cinayətlərini üzə çıxarırdılar.
"Təəssüf ki, dövlət qurumları bu faktlar əsasında dövlət məmurlarına qarşı cinayət işləri açmaq əvəzinə bu cinayətləri üzə çıxaran jurnalistləri çirkli pulları yumaq ittihamı ilə həbs edib", deyə o qeyd edib.
Məhkəmə və qanunvericilik hakimiyyətləri hökumətə tabe edildikdən sonra müstəqil medianı da məhv edirlər.
"Amma mən inanıram ki, demokratiya dəyərlərinə sadiq olanlar bu ölkənin yeganə pəncərəsini - azad medianı məhv etməyə imkan verməyəcəklər. Bu mükafat korrupsiya cinayətlərini üzə çıxaran bütün jurnalistlərin nailiyyətinin etirafı oldu", deyə Vaqifqızı qeyd edib.
