Daşkənddəki Beynəlxalq Mərkəzi Asiya İnstitutunda “Çingiz Aytmatov: ədəbi irs, fəlsəfi-siyasi baxışlarda zaman və mədəniyyətlərin harmoniyası” mövzusunda xatirə gecəsi keçirilib.
Qırğızıstanın Özbəkistandakı səfirliyi ilə birgə təşkil olunan tədbirdə Qırğızıstanın Mədəniyyət, İnformasiya, İdman və Gənclər Siyasəti Nazirliyinin və böyük yazıçının adını daşıyan Beynəlxalq İssık-Kul Forumunun nümayəndələri, səfirlər, elm, mədəniyyət, incəsənət xadimləri, hər iki ölkənin elmi-tədqiqat müəssisələrinin təmsilçiləri, şair və yazıçılar iştirak ediblər.
İnstitutun direktoru Cavlon Vahobov Özbəkistanda Çingiz Aytmatova və onun yaradıcılığına hər zaman xüsusi hörmətlə yanaşıldığını, yazıçının ideya-fəlsəfi irsinin yüksək qiymətləndirildiyini vurğulayıb.
O deyib ki, uzaqgörən yazıçı və diplomat olan Çingiz Aytmatovun siyasi baxışları və ideyaları Mərkəzi Asiyanın müasir inkişaf tendensiyaları ilə heyrətamiz şəkildə birləşib.
Yazıçının ictimai çıxışlarından bu gün üçün də aktual olan fikirləri, öz dəqiqliyi ilə insanları təəccübləndirən proqnozları anlamaq mümkündür.
Tədbirdə Qırğızıstanın Özbəkistandakı müvəqqəti işlər vəkili Asanqul Bakıt, Özbəkistan mədəniyyət nazirinin birinci müavini Avazxan Tacixanov, akademik Akmal Saidov və başqaları Çingiz Aytmatovu böyük yazıçı və diplomat kimi səciyyələndiriblər.
Konfrans çərçivəsində iştirakçılar Çingiz Aytmatovun ədəbi irsi, siyasi ideyaları, ictimai proseslərə təsiri, dövlətçiliyin inkişafına, region ölkələri xalqlarının dostluğunun möhkəmləndirilməsinə yönəlmiş təşəbbüslərindən danışıblar.
Həmçinin iki ölkə arasında ortaq tarix və ənənələrin harmoniyasına əsaslanan mədəni-humanitar əlaqələrin möhkəmləndirilməsinin vacibliyi, qarşılıqlı faydalı regional əməkdaşlığın daha da inkişaf etdirilməsi perspektivlərinə diqqət yetirilib.
Mədəni ünsiyyətin sürətləndirilməsində Çingiz Aytmatov irsinin əhəmiyyəti vurğulanıb. Böyük yazıçı və diplomatın yaradıcılığının, ictimai-siyasi fikirlərinin bu gün də aktuallığını qoruduğu və qardaş xalqların birləşməsi, Yeni Orta Asiyanın birgə qurulması məqsədlərinə xidmət etdiyi bildirilib.
Xatırladırıq ki, Çingiz Aytmatov həmçinin Azərbaycanın dostu olub, əsərlərinin bir çoxu dilimizə tərcümə edilərək Azərbaycan oxucularına çatdırılıb, ölkəmizin “Dostluq” ordeninə layiq görülüb.
Qulu Kəngərli
XQ-nin Türküstan üzrə xüsusi müxbiri
Daşkənd
