“Görünən odu ki, gələn il daha çox işləməliyik” – Qurban Qurbanov

Misli premyer-liqasının 18-ci turunda “Qarabağ” “Tofiq Bəhramov”da “Araz-Naxçıvan”ı 2:0 məğlub etdi.

“Football-plus.az” xəbər verir ki, oyunsonrası mətbuat konfransında ağdamlıların baş məşqçisi Qurban Qurbanov jurnalistlərin suallarını cavablayıb:

- Futbolçularımı təbrik edirəm. Həqiqətən çox yaxşı komandaya qarşı oynayırdıq. "Araz-Naxçıvan" uduzsa da, çox yaxşı idman forması göstərən kollektivdi. Bütün oyunlarda eynidilər. Nəticələri də çox yaxşıdı. Elmar Baxşıyevə və komandasına uğurlar arzulayıram. Futbolçularıma yanvardan bəri göstərdikləri performansa görə təşəkkür edirəm. Azarkeşlərimizə də həmçinin. Bizi tək qoymadılar. Yaxşı nəticə oldu. Qələbə çox vacib idi ki, tətilə pozitiv notda yollanaq. Görünən odu ki, gələn il daha çox işləməli və daha sağlam, diqqətli olmalıyıq. Xalqımıza gələn il xoş günlər arzulayıram. Ölkəmiz üçün faydalı il olmasını arzulayıram.

- Geridə qoymaqda olduğumuz 2024-ə əvvəldən baxsaq, ili necə qiymətləndirərsiz?
- Çox yaxşı. Bu ili ən uğurlu illərdən adlandırıram. "Braqa", "Bayer" ilə oyunlarımız oldu. Ölkəmiz üçün futbol ili idi. Xalqımız böyük futbol yaşadı. Oyunların hamısı gərgin və maraqlı oldu. Həyəcanlı qələbələr, həyəcanlı məğlubiyyətlər var idi. "Bayer"ə hər iki maçda qalib gəlmək üçün yaxşı şansımız var idi. Çempion olduq, kubok aldıq. Minimum məqsədə çatdıq, ÇL-in pley-off mərhələsində oynadıq. Məğlubiyyətlər oldu AL-də. Olmamalı idi, ancaq oldu.

- İlin ən yaxşılarını seçirlər. Siz özünüz də ilin ən yaxşısı seçildiz. 2024-ün ən yaxşı yerli futbolçusu kimdi?
- Düşünməmişəm. İlk ağlıma gələn Toral oldu. Çox yaxşı mövsüm keçirdi. Avrokuboklarda da, çempionatda da. Komandamın ən fəal oyunçularından oldu. Siyahıya baxacam.

- Serxio Ramos məsələsi doğrudu?
- Yox. Doğru məlumat deyil.

- Müdafiə xəttini gücləndirmək istəyirsiz?
- Düşünürük.

- Qış hazırlıq planınız bəllidi?
- Bəllidi. Bakıda qalacağıq. Yanvarın 9-u və 12-də oyunumuz olacaq. Qısa hazırlıq dönəmidi.

- Juniyno ilə bağlı yeni xəbər var?
- Elə ilk olan danışıqlardı, həmin təklifdi. Sonra dedilər əlaqə saxlayacağıq, hələ ki sakitlikdi.

- Nə qədər məbləğ təklif etsələr, buraxarsız?
- Mənə aid məsələ deyil.

- "Sevilya"dan zəng gəlməməsi sizi sevindirir?
- Normal prosesdi. Böyük klubdu, dərindən düşünürlər. Hansı yaxşıdı, o da olsun.

- “Araz-Naxçıvan" "Qarabağ"la çempionluq uğrunda mübarizə aparacaq klubdu?
- “Araz-Naxçıvan" çox yaxşı komandadı, təcrübəli, bacarıqlı futbolçuları var. Amma bugünkü oyuna görə belə fikir bildirməyim çətin olar. "Araz-Naxçıvan"ın futbolçuları bəlkə daha istəkli idilər. O temp, o dinamika, mübarizə tam yox idi. Bəlkə də yorğunluqdan irəli gəlirdi. Bütün ölkələrdə ilin sonunda gəzə-gəzə oynayırlar. Futbolçular istirahət haqda düşünürlər.

- İllərdi legionerlərə görə təklif gəlir. Bəs nə vaxt "Qarabağ"ın yerli futbolçularını Avropa klubları transfer edəck?
-Bəlkə də tezdi. Bu yöndə ayrıca iş qurulmalıdı. Amma bunun üçün istər-istəməz çempionatımızın səviyyəsi qalxmalıdı. Kənar ölkələr bizim liqaya dəyər verməlidilər. Buna da vaxt lazımdı. Get-gedə alınmalıdı. Xaricə transfer etmək üçün ayrıca iş qurulmalıdı, təbliğat aparılmalıdı. Bəlkə oyunçularımız daha çox reklam olunmalıdı. Yəqin onun da zamanı gələcək.

- İcraiyyə Komitəsində pozitiv hansı müzakirələr oldu?
- Əfsuslar olsun ki, heç nə deyə bilməyəcəm. Çünki gərək rəsmi xəbər verilsin, bəlkə sonra hansısa maddə üçün fikir söyləyə bilərik.

RÖYANƏ OĞUZ