Bir sıra dünya ölkələri Rusiya lideri Vladmir Putinlə ABŞ-ın yeni seçilmiş prezidenti Donald Tramp arasında mümkün danışıqlara ev sahibliyi etməyə hazır olduqlarını bəyan ediblər . Manset.az Rusiya mediasına istinadən xəbər verir ki, bu barədə Kreml rəhbərinin beynəlxalq məsələlər üzrə köməkçisi Yuri Uşakov məlumat verib. “Biz müxtəlif ölkələrdən Putin və Tramp arasında danışıqlar platforması üçün bir neçə təklif almışıq. Bunların hansı ölkələr olduğunu deməyəcəyəm” ,- deyə Uşakov bildirib. Rusiya prezidentinin mətbuat katibi Dmitri Peskov dekabrın 23-də bildirib ki, Vladimir Putinlə Donald Trampın görüşünün təşkili üçün heç bir ilkin şərt yoxdur. Kreml rəsmisi Trampın andiçmə mərasimindən əvvəl siyasətçilər arasında görüşün mümkün olub-olmaması ilə bağlı suala “Hələ real impulslar olmayıb” deyə cavab verib. Bu arada Rusiya Federasiya Şurasının Beynəlxalq Əlaqələr Komitəsi sədrinin birinci müavini Vladimir Cabarov bununla bağlı fikirlərini səsləndirib. O, qeyd edib ki, Trampın Ukrayna münaqişəsinə son qoymaq üçün hələlik Putinə təqdim edə biləcəyi konkret təklifləri yoxdur. "Biz güzəştə getməyə hazırıq, lakin kompromislər ölkəmizin milli maraqları bahasına olmamalıdır. Ona görə də hələlik Putin və Tramp arasında danışıqlar və görüşlər üçün konkret tarix yoxdur”, - deyə rusiyalı senator bildirib. Dekabrın 22-də ABŞ-ın yeni seçilmiş prezidenti Ukraynadakı münaqişənin həlli üçün Rusiya prezidenti ilə görüş gözləyəcəyini bildirib. “Prezident Putin mənimlə tez bir zamanda görüşmək istədiyini söylədi. Ona görə də biz bunu gözləyəcəyik, bu müharibəni bitirməliyik”, - deyə Tramp bildirib. Rusiya prezidenti Vladimir Putin illik mətbuat konfransı ilə birlikdə birbaşa xətt zamanı Donald Trampla görüş ehtimalı ilə bağlı sualı cavablandırıb. Rusiya lideri bildirib ki, ABŞ-ın seçilmiş prezidenti ilə mümkün görüşün vaxtı hələlik məlum deyil. “Əvvəla, onunla nə vaxt görüşəcəyimizi bilmirəm, çünki o, bu barədə ümumiyyətlə heç nə demir. Amma o istəsə, mən görüşə hazır olacam”, - deyə V. Putin açıqlayıb.
