Gürcüstan prezidenti Salome Zurabişvili yeni parlament seçkilərinə hazırlıq məsələləri ilə məşğul olacaq şuranın yaradıldığını açıqlayıb.
"Artıq tezliklə baş tutacaq seçkilərin keçirilməsi üçün bütün şərtlərin təsvir olunacağı sənəd hazırlanır", deyə Gürcüstan KİV-ləri Zurabişvilidən sitat gətirir.
Dünən Tbilisidə minlərlə insanın iştirak etdiyi mitinqdə o, hakim partiyaya yeni seçkilərin tarixini təyin etmək üçün altı gün vaxt verib. Lakin "Gürcü Arzusu" bu tələbi gülünc adlandırıb və ona məhəl qoymayıb.
"Böhran gündən günə güclənir və dərinləşir, hakim partiya bunu ya görmür, ya da görmək istəmir", deyə prezident qeyd edib.
Xatırladaq ki, "Gürcü Arzusu" dekabrın 29-na yeni prezidentin inauqurasiyasını təyin edib. Lakin bu gün Zurabişvili bildirib ki, dekabrın 29-na qədər "Gürcü Arzusu" ilə yeni parlament seçkiləri ilə bağlı razılıq əldə olunmasa, bu, "rejimin devrilməsinə" gətirib çıxaracaq. O, həmçinin prezident səlahiyyətlərindən istefa vermək niyyətində olmadığını qeyd edib.
