Ukrayna prezidenti Vladimir Zelenski Vaşinqtona səfərini ABŞ prezidenti Co Baydenlə birgə mətbuat konfransı ilə başa vurub və bu zaman hər iki lider ABŞ-ın Kiyevə hərbi yardım göstərməsinin vacibliyini qeyd ediblər. Bu barədə Vətəninfo.az ABC News-a istinadən xəbər verir.
Mətbuat konfransı zamanı Bayden Konqresi “hərəkət etməyə” çağırıb və Zelenskini ABŞ-ın Ukraynadan üz döndərməyəcəyinə inandırıb. Ağ Ev rəhbəri 200 milyard dollarlıq yeni hərbi yardım paketini açıqlayıb, baxmayaraq ki, gələcək hərbi yardımın taleyi naməlum olaraq qalır.
Məsələ ondadır ki, Konqres Ağ Evin Ukraynaya təqdim etdiyi yeni əlavə hərbi dəstək paketini təsdiq etməyib. Paketin təsdiqi müqabilində respublikaçılar ABŞ-da immiqrasiya və sığınacaq məsələlərində islahatların aparılmasını tələb edirlər. 110 milyard dollarlıq paketə Ukraynaya 61 milyard dollar yardım, həmçinin İsrailə maliyyə və Qəzzaya yardım daxildir.
Baydenlə birgə mətbuat konfransında Zelenski dəstəyə görə təşəkkür edib, həmçinin Konqresin Demokratlar və Respublikaçılarının Ukraynanı dəstəkləyəcəyinə ümid etdiyini bildirib.
Ukrayna prezidenti həmçinin bəyan edib ki, Rusiya ilə münaqişənin həlli üçün heç bir ərazi kompromisini mümkün hesab etmir.
Kiyevin NATO-ya üzvlüyünə gəlincə, Bayden bəyan edib ki, “Şübhəsiz ki, NATO Ukraynanın gələcəyində olacaq”, lakin bundan əvvəl Ukraynanın müharibədə qalib gəlməsini təmin etmək lazımdır.
ABŞ prezidenti ilə görüşdən əvvəl Zelenski ABŞ Konqresinə səfər edib və hər iki partiyanın senatorları, həmçinin Nümayəndələr Palatasının sədri Mayk Consonla görüşlər keçirib.
