Səudiyyə Ərəbistanının dövlətə məxsus Səudiyyə Ərəbistanı Hərbi Sənaye Şirkəti (SAMI) Türkiyənin müdafiə şirkətləri ilə üç anlaşma memorandumu imzalayıb.
Səudiyyə şirkəti bildirib ki, sazişlər krallıqda “müdafiə sənayesinin lokallaşdırılmasına dəstək” məqsədi daşıyır.
Açıqlamada SAMI Türkiyənin təyyarə istehsalçısı Baykar ilə Səudiyyə Ərəbistanında istehsal müəssisələrinin yaradılmasını və türk istehsalçısının pilotsuz təyyarələri üçün sistemlərin inkişaf etdirilməsini nəzərdə tutan memorandum imzaladığını açıqlayıb. Bundan əlavə, şirkətlər “krallığa texnologiya və əqli mülkiyyətin birgə inkişafı və ötürülməsi” imkanlarını nəzərdən keçirəcəklər.
SAMI həmçinin Səudiyyə Ərəbistanında “qlobal kosmik sektora xidmət etmək üçün yeni texnologiyaların inkişafı mərkəzi” yaratmaq üçün Fergani Space ilə razılığa gəlib.
SAMI Türkiyənin Aselsan müdafiə şirkəti ilə üçüncü memorandum imzalayıb. Bu saziş Səudiyyə Ərəbistanının xeyrinə “mütərəqqi müdafiə elektron texnologiyalarının ötürülməsi, lokallaşdırılması və inkişafı imkanlarının araşdırılmasını” nəzərdə tutur.
Anlaşma memorandumları Səudiyyə Ərəbistanının müdafiə naziri şahzadə Xalid bin Salman Əl Səudun Türkiyəyə səfəri zamanı imzalanıb. İyulun 2-də Səudiyyə Ərəbistanı departamentinin rəhbəri Ankaraya gəlib və burada prezident Rəcəb Tayyib Ərdoğan və müdafiə naziri Yaşar Gülər ilə görüşüb.
Oxuməni.az
