NATO liderləri iyulun 9-dan 11-dək Vaşinqtonda keçiriləcək sammitdə Ukraynadakı müharibə təcrübəsini nəzərə alaraq yenilənmiş hərbi planları müzakirə edəcəklər.
KONKRET.az xarici mediaya istinadən xəbər verir ki, bu planlara NATO-nu Rusiyanın mümkün hücumundan qorumaq üçün 35-50 yeni briqadanın yaradılması daxildir.
Agentliyin həmsöhbəti komandaların yaradılması planlarının təfərrüatlarını açıqlamayıb. Bununla belə, bir briqadanın yaradılması 3 mindən 7 minə qədər hərbçi tələb edir. Planları şərh etmək istəyən bir NATO rəsmisi deyib ki, hərbi blokun əsas prioritetləri arasında hava və raketdən müdafiə sistemləri, logistika və böyük quru birləşmələri var.
NATO-nun bu qədər sayda briqada yaratmaq üçün lazımi sayda hərbi personalı haradan cəlb edəcəyi hələlik bəlli deyil. Beləliklə, qoşunlar silahlı qüvvələrin digər hissələrindən köçürülə və ya əlavə əsgərlər cəlb oluna bilər. NATO ölkələri də hər iki yanaşmanın kombinasiyasını seçə bilər.
Qeyd edək ki, 2023-cü ilin payızında Çexiya prezidenti Petr Pavel bəyan etmişdi ki, NATO Rusiyanı Avropa üçün bir nömrəli təhlükə hesab edir. 2024-cü ilin yanvarında Alyansın baş katibi Yens Stoltenberq Rusiya Federasiyasından dərhal təhdid görmədiyini söyləmişdi. Almaniyanın “Bild” nəşri isə yazmışdı ki, Rusiya NATO-ya mərhələli şəkildə hücum edəcək. Bunlardan biri də Rusiya qoşunlarının Almaniya ərazisinə keçməsi olacaq.
Günel Mikayılova,
KONKRET.az
