2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təbliğat-təşviqat mərhələsi çərçivəsində Yeni Azərbaycan Partiyası (YAP) tərəfindən 56 saylı Şabran-Xaçmaz seçki dairəsindən deputatlığa namizədliyi irəli sürülmüş Mahir Süleymanlının Şabran şəhərində seçicilərlə görüşü keçirilib.
Görüşü giriş sözü ilə açan YAP Şabran rayon təşkilatının sədri Mehdi Balabəyov YAP-ın seçki platforması haqqında ətraflı danışıb, Ulu Öndər Heydər Əliyev ideyalarından güc alan partiyanın ölkə qarşısında duran problemləri həll etməyə, xalqımızı xoşbəxt gələcəyə aparmağa qadir bir siyasi qüvvə olduğunu deyib. O, həmçinin YAP Sədri, Prezident İlham Əliyevin rəhbərliyi ilə istənilən sahədə ciddi nailiyyətlər qazanıldığını və tarixi Zəfərimizin hər kəs üçün milli qürur mənbəyinə çevrildiyini söyləyib.
Daha sonra rayon təşkilatınnı sədri deputatlığa namizəd Mahir Süleymanlı haqqında seçicilərə məlumat verib.
Çıxış edən Mahir Süleymanlı bildirib ki, parlament seçkiləri ölkəmizin ictimai-siyasi həyatında mühüm rol oynayır. Namizəd Azərbaycanın düşmən üzərindəki tarixi Zəfərindən sonra yeni reallıqların yarandığını, yeni dövr başladığını və bu gün Azərbaycan xalqının formalaşmış yeni reallıqlar fonunda inamla və qürurla öz inkişafının növbəti mərhələsinə qədəm qoyduğunu diqqətə çatdırıb.
Mahir Süleymanlı deputat seçiləcəyi təqdirdə ona göstərilən etimadı doğruldacağına söz verib.
Tədbirdə təşviqat qrupunun üzvü Şəfiqə Məmmədova və digərləri çıxışlarında deyiblər ki, YAP-ın ideologiyasının və fəaliyyətinin əsas istiqamətini məhz dövlətimizin, cəmiyyətimizin inkişafı, onun qüdrətinin daha da artması təşkil edir.
Çıxış edənlər 1 sentyabrda Şabran seçicilərini məntəqələrə gedərək YAP-ın namizədlərinə səs verməyə çağırıblar.
Qeyd edək ki, həmin gün deputatlığa namizəd rayonun Gəndov kəndində 2017-ci il dekabrın 13-də Füzuli rayonu istiqamətində erməni silahlı qüvvələrinin təxribatının qarşısını alarkən qəhrəmancasına şəhid olmuş Fizuli Salahovun atası Süleyman Salahovun 40 mərasimində iştirak edib, şəhid ailəsinin qayğı və problemləri ilə maraqlanıb
