2024-cü il 1 sentyabr tarixində keçiriləcək növbədənkənar parlament seçkiləri ilə bağlı 120 saylı Cəbrayıl-Qubadlı seçki dairəsindən YAP-ın vahid namizədi Ceyhun Məmmədovun Cəbrayıl rayonu, Cocuq Mərcanlı kəndində məskunlaşan seçiciləri ilə növbəti görüşü keçirilib.
Görüşdə YAP Cəbrayıl Rayon Təşkilatının sədri Arif Fərzəliyev, 1-ci dərəcəli “Əmək” ordenli, Azərbaycan Dövlət Ehtiyatları Agentliyinin işğaldan azad olunmuş ərazilərdə xidmət rəisi Oqtay Həziyev iştirak edib.
Deputatlığa namizəd Ceyhun Məmmədov Ulu Öndər Heydər Əliyevin rəhbərliyi ilə 1994-cü ildə həyata keçirilmiş “Horadiz” əməliyyatı zamanı Füzuli rayonunun 20-dən çox yaşayış məntəqəsi ilə yanaşı, Cəbrayıl rayonunun Cocuq Mərcanlı kəndinin də işğaldan azad edilməsini vurğulayıb. Qeyd olunub ki, cənab prezidentin rəhbərliyi ilə Cocuq Mərcanlı kəndində aparılan tikinti-bərpa işləri qısa zaman ərzində başa çatdırılmış, 14 iyun 2017-ci il tatixində cənab Prezident Cəbrayıl rayonunun işğaldan azad olunmuş Cocuq Mərcanlı kəndinin bərpadan sonra açılışında iştirak etmişdir.
Görüşün sonunda seçicilərin fikir və təklifləri dinlənilib, mövcud problemlərin həlli istiqamətində müvafiq addımlar atılıb.