“Bayern”in yarımmüdafiəçisi Yozua Kimmix Münhen klubu ilə 2025-ci ilin yayında başa çatacaq müqaviləsi ilə bağlı sualı cavablayıb.
Arena.az alman futbolçunun bu barədə fikrini təqdim edir:
“Mən klubla müqaviləni müzakirə etməyə hazıram. Klubundan dəstək almaq həmişə xoşdur. Mən sadəcə anın həzzini yaşayıram. İndi oyunları qazanmaq vacibdir”, deyə Kimmix vurğulayıb.
Xatırladaq ki, daha əvvəl mətbuatda, “Barselona”nın gələn yay Kimmixi azad agent qismində heyətinə qatmaq məqsədilə tədbir gördüyü haqda məlumat yayılmışdı. Vurğulanırdı ki, Kataloniya klubu alman futbolçu ilə fəal maraqlanır və müvafiq məlumatları toplayır.
Yozua Kimmix “Bayern”ə 2015-ci ilin iyulunda 8,5 milyon avro məbləğ müqabilində “Ştutqart”dan keçib. Alman futbolçunun Münhen klubu ilə müqaviləsi 2025-ci iliin iyun ayının sonuna qədər qüvvədədir.
Kimmix cari mövsümdə münhenlilərin heyətində 4 oyuna çıxıb, hələ fərqlənə bilməyib. Kimmixin “Bayern”in heyətində ümumi statistikası isə belədir: 394 oyun, 42 qol, 104 məhsuldar ötürmə.
Yozua Kimmix 2016-cı ilin mayında debüt etdiyi Almaniya yığmasının heyətində 93 oyuna 7 qol və 21 məhsuldar ötürmə ilə fərqlənib. Kimmix bundestimlə 2017 FIFA Konfederasiyalar Kubokunu qazanıb. Həmçinin Yozua Almaniyanın U-19 yığması ilə Avropa çempionatının qalibi olub.
Kimmix “Bayern”in heyətində 8 dəfə Almaniya Bundesliqasının, 3 dəfə Almaniya Kubokunun, 6 dəfə Almaniya Super Kubokunun və hərəsi 1 dəfə olmaqla UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
“Transfermarkt” internet-portalı 29 yaşlı alman futbolçunun transfer dəyərini 50 milyon avro məbləğində qiymətləndirir.
