Vətəninfo.az xəbər verir ki , Hollandiyanın müdafiə naziri Ruben Brekelmans F-16 qırıcılarının ilk partiyasının Ukraynaya göndərildiyini açıqlayıb .
Brekelmans Xarkov və Kiyevə səfər etdikdən sonra X sosial platformasında yazıb: “İlk dəfə rəsmi olaraq ilk holland F-16-larının Ukraynaya göndərildiyini elan edə bilərəm”.
Göndərilən təyyarələrin sayı dəqiqləşdirilməyib.
Nazirin sözlərinə görə, vəd edilən 24 döyüş təyyarəsinin digər partiyası yaxın aylarda göndəriləcək.
Ukraynanın müdafiə naziri Rustem Umerov Hollandiyaya hərtərəfli dəstəyə görə təşəkkür edib.
Brekelmans həmçinin Kiyevi qabaqcıl kəşfiyyat, müdafiə və zərbə vuran dronlarla təmin edəcək 400 milyon avro dəyərində “Dron Fəaliyyət Planı”nın işə salındığını elan edib.
Ukraynanı F-16-larla təmin etməyi öhdəsinə götürən Hollandiya və Danimarka “F-16” koalisiyasına rəhbərlik edir, bu koalisiya çərçivəsində ukraynalı pilotlar hazırlanır.
Avqustun əvvəlində Danimarkanın müdafiə naziri Troels Lund Poulsen ilk F-16-ların Ukraynaya gəldiyini təsdiqləyib. Ölkə ilin sonuna qədər daha bir yük göndərmək niyyətindədir. Ümumilikdə Kopenhagen Kiyevə 19 döyüş təyyarəsi tədarük edəcəyinə söz verib.
