Fransanın Martinika departamentində komendant saatının vaxtının uzadılması etirazlara səbəb olub. “Figaro” nəşrinin yazdığına görə, narazı kütlə departamentin mərkəzi Fort de Fransda yolları bağlayıb, barrikadalar qurub. Polis aksiyanı yatırmaq üçün güc tətbiq edib. Qarşıdurma zamanı çox sayda avtomobil, iş yeri və ticarət obyekti yandırılıb. Hadisə nəticəsində bir neçə nəfər xəsarət alıb, 3 etirazçı saxlanılıb. Onlardan ikisi həbs edilib. Bahalığa qarşı aksiyaların davam etdiyi Martinika departamentində komendant saatının vaxtı oktyabrın 28-dək uzadılıb.
Bununla bağlı Sfera.az-a açıqlama verən siyasi şərhçi Kənan Novruzov deyib ki, Martinikadakı etirazlar ölkə miqyaslıdır:
“Yəni etirazlar təkcə Martinika ilə kifayətlənmir. Üstəgəl, Fransanın istismarına məruz qalan ərazilərdə də rəsmi Parisə qarşı etirazlar həyata keçirilir. Bütün bunlar əslində Yelisey Sarayı üçün ciddi siqnaldır. Məsələ burasındadır ki, Fransanın mövcud hakimiyyəti özünün iddia etdiyindən fərqli olaraq demokratiyadan çox uzaqdır. Ölkədə polis zorakılığı ara vermir. Dini ayrı- seçkilik, o cümlədən islamafobiya meyilləri də səngimir. Ölkədə prezident Emmanuel Makronun reytinqi getdikcə azalır. Bu, mövcud iqtidarın daxili və xarici siyasətindəki uğursuzluğunun təzahürüdür”.
Şərhçi qeyd etdi ki, rəsmi Paris baş verənlərdən dərs çıxarmalıdır:
“Əks halda, Makron hakimiyyətinin nüfuzu getdikcə daha da azalacaq. Bu isə onun vaxtından əvvəl hakimiyyətlə sağollaşması ilə nəticələnə bilər. Ümumiyyətlə, Fransanın hazırkı siyasi kursu, yəni hegemonluq cəhdi müasir beynəlxalq münasibətlər sistemində qəbuledilməzdir. Nəzərə almaq lazımdır ki, Fransa bəzən hətta özünün müdafiə etdiyi beynəlxalq hüquqa da qarşı çıxır. Bu isə rəsmi Parisə heç bir halda baş ucalığı gətirməz. Belə davam edərsə, aksiyalar daha da güclənə bilər. Sözügedən vəziyyət Fransa hakimiyyəti üçün yaxşı nə isə vəd etmir”.
Günay Rəsulqızı
