“İnter Mayami”nin argentinalı ulduz hücumçusu Lionel Messi ABŞ-da və MLS-də onu nəyin təəccübləndirdiyi ilə bağlı sualı cavablayıb.
Arena.az ESPN şəbəkəsinin “433 Football” dərgisinə istinadı əsasında, argentinalı ulduzun bu barədə cavabını təqdim edir:
“Burada çox şövq var, bu, mənim üçün gözlənilməz oldu. Mən burada basketbolun, beysbolun və amerikan futbolunun nə qədər məşhur olduğunu bilirdim, amma adi futbola belə münasibət eşitməmişdim, ona görə də çox təəccübləndim. MLS rəqabətli bir liqadır. Hər komanda öz meydanında güclüdür, ona görə də səfərdə oynamaq asan deyil”, deyə “Leo” vurğulayıb.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz cari mövsümdə “İnter Mayami”nin heyətində 23 oyuna çıxıb, 22 qol vurub və 13 məhsuldar ötürmə verib. Təcrübəli ulduzun “İnter Mayami” karyerası ümumilikdə 37 oyun, 33 qol və 18 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 189 oyun keçirib, 112 qol vurub və 60 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
