Fransa yığmasının baş məşqçisi Didye Deşam “xoruzlar”ın ulduz hücumçusu Kilian Mbappeyə hələ də ümid bəsləyir.
Arena.az məlumat verir ki, fransız mütəxəssis millinin oktyabr və noyabr toplanışlarına cəlb etmədiyi futbolçunun idman formasını yenidən bərpa edəcəyinə inanır:
“O, çətin vəziyyətdədir. Görünür ki, Kilian 2024-cü ildə daha az səmərəli olmasına rəğmən, özünün idman formasını bərpa etmək üçün hər şeyi edəcək. Onun bunu etməyəcəyini düşünmək üçün ortada heç bir səbəb yoxdur. Mən bunu ona arzulayıram. Yenə də vurğulayram, o, çətin dövr yaşayır, amma Mbappenin artıq əldə etdiklərini bir daha təkrarlamaq üçün hər şeyi var”, – Deşam “TF1” telekanalının “Telefoot” verilişində bildirib.
Mbappe futbola Fransanın “Bondi” klubunda qədəm qoyub. Ardınca “Klerfonten”ə keçib, oradan isə “Monako”ya yol tapıb və böyük futbolda məhz “Monako” ilə debüt edib.
2015-2018-ci illərdə Knyazlıq klubunun əsas komandasında çıxış etmiş Mbappe, 2018-ci ilin iyulunda 180 milyon avro müqabilində PSJ-yə keçib. Kilian 2018-2024-cü illər aralığında Paris klubunun heyətində 307 oyuna çıxıb, 256 qol, 108 məhsuldar ötürmə ilə yadda qalıb. Vurduğu 256 qolla Mbappe PSJ tarixinin ən sərrast futbolçusudur.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Mbappe “Real”ın heyətində 16 oyuna 8 qol vurub, 2 məhsuldar ötürmə verib.
Klub səviyyəsində Mbappe PSJ ilə 7 dəfə Fransa Liqa 1-in, 3 dəfə Fransa Kubokunun, 2 dəfə Fransa Liqa Kubokunun, 3 dəfə Fransa Super Kubokunun qalibi olub, həmçinin dəfələrlə müxtəlif fərdi mükafatlara layiq görülüb. “Real”la isə Mbappe UEFA Super Kubokunun qalibi olub.
Mbappe hazırda kapitanı olduğu, 2017-ci ilin martında debüt etdiyi Fransa yığmasının heyətində 86 oyun keçirib, 48 qol vurub və 35 məhsuldar ötürmə verib. Kilian “xoruzlar”la 2018-ci ildə Rusiyada keçirilmiş dünya çempionatının (DÇ-2018) və UEFA Millətlər Liqasının (2021) qalibi olub.
“Transfermarkt” internet-portalı 25 yaşlı fransalı hücumçunun transfer dəyərini 180 milyon avro məbləğində qiymətləndirir.
