“Botafoqo”nun prezidenti Dursesio Mello “Əl-Hilal”ın braziliyalı ulduz hücumçusu Neymarı transfer etmək ehtimalını istisna edib.
Arena.az “Goal” dərgisinə istinadən, Mellonun bu barədə fikrini təqdim edir:
“Tanrı qorusun. Neymar indiyə qədər gördüyüm ən yaxşı oyunçulardan biridir. O, Messi ilə bərabərdir və Kristiano Ronaldodan qat-qat üstündür. Amma o, karyerasını bada verdi, nəticədə zədəsi onu bir ildən çox müddəti buraxmağa məcbur etdi. İndi o, yenidən zədələnib”, deyə “Botafoqo”nun prezidenti təəssüflə bildirib.
Xatırladaq ki, daha əvvəl “Palmeyras”ın prezidenti Leyla Pereyra Neymarın transferi ilə bağlı sualı cavablayaraq, zədəli futbolçuya ehtiyacı olmadığını vurğulamışdı.
Neymar “Santos”un məzunudur. “Ney” 2009-2013-cü illərdə Braziliya klubunun əsas komandasında çıxış edib. Bu müddət ərzində Neymar “balıqlar”ın heyətində 225 oyuna çıxıb, 136 qol və 64 məhsuldar ötürmə ilə fərqlənib.
Xatırladaq ki, braziliyalı futbolçu ötən il DÇ-2026-nın seçmə mərhələsi çərçivəsində Braziliya millisinin Uruqvay yığmasına qarşı keçirdiyi oyunda (0:2) ağır zədə alaraq, dizinin çarpaz bağlarını yırtmış və bu səbəblə cərrahi əməliyyat edilmişdi. “Ney” ötən həftə Asiya Çempionlar Liqasının “Əl-Ayn”a qarşı oyununda nəhayət ki, yaşıl meydanlara qayıtmışdı. Buna rəğmən “Ney” növbəti oyununda yenidən zədə alaraq, iki həftə müddətinə sıradan çıxıb.
Avropada debütü “Barselona” ilə başlamış Neymar daha sonra Kataloniya klubunu öz isətəyi ilə tərk edib. 2023-cü ilin yayında, PSJ-də 6 il keçirdikdən sonra Neymar “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib. Bu məbləğ Neymarın təxmin edilən bazar qiymətindən dəfələrlə bahadır.
Təcrübəli hücumçu ötən mövsüm “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı hücumçunun transfer dəyərini 30 milyon avro məbləğində qiymətləndirir.
