Madrid “Real”ının cinah hücumçusu Vinisius Junior karyerası boyu üzləşdiyi təzyiqlər və Braziliya millisinə münasibətindən söhbət açıb.
Arena.az xatırladır ki, Avropada qolları sıralayan braziliyalı ulduz DÇ-2026-nın CONMEBOL bölgəsi üzrə seçmə mərhələsi çərçivəsində meydana çıxıdığı 7 oyunda bir qol belə vura bilməyib.
“Mən, doğulduğumdan bəri təzyiq altında yaşayıram, çünki əziyyət çəkməli olduğum çox təhlükəli bir yerdə böyümüşəm. “Flamenqo”ya keçidim də böyük bir fəsad idi. Çox eniş-yoxuşlarım olub, amma ölkəmiz üçün böyük işlər görmək naminə daim tərəqqimə fikir vermişəm. Mən komanda yoldaşlarım, məşqçilər qərargahı və bütün heyətlə birlikdə Braziliyanı “1” nömrəli komandaya çevirmək üçün mümkün hər şeyi etmək istəyirəm”, – Braziliya Futbol Konfederasiyasının (CBF) rəsmi saytı Vinisiusdan sitat gətirir.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 17 oyuna çıxıb, 12 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 281 oyun, 95 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 37 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
