ABŞ-ın yeni seçilmiş prezidenti Donald Tramp Milli Təhlükəsizlik Şurasının keçmiş katibi Keyt Kelloqu Ukrayna və Rusiya üzrə xüsusi elçi və prezidentin köməkçisi təyin edəcək.
Musavat.com xəbər verir ki, o, bu barədə Truth Social-dakı hesabında məlumat verib.
Hazırda Ukraynada müharibə ilə bağlı xüsusi nümayəndə olmasa da, Tramp əvvəllər özəl olaraq belə bir mövqe yaratmaqda maraqlı olduğunu bildirib.
O, 80 yaşlı Kelloqun “bacarıqlarına” güvəndiyini deyib: "Keytin görkəmli hərbi və biznes karyerası olub, o cümlədən mənim ilk administrasiyamda çox mühüm milli təhlükəsizlik vəzifələrində xidmət edib. Biz birlikdə gücümüzlə sülhü təmin, Amerika və dünyanı yenidən təhlükəsiz edəcəyik".
2024-cü ilin yayında Qərb mediası yazıb ki, Kelloq Trampa Ukraynada münaqişəyə son qoymaq planını təqdim edib, bu plana cəbhə xəttinin dondurulması və Moskva ilə Kiyev arasında danışıqların başlanması daxildir. O, Ukrayna danışıqlar prosesində iştirak etməyə razı olmadığı təqdirdə onu Amerika silahlarının tədarükündən məhrum etməyi təklif edib.
İstefada olan general-leytenant Kelloq 2017-ci ildə ABŞ Prezidentinin Milli Təhlükəsizlik Müşavirinin səlahiyyətlərini müvəqqəti icra edən, 2017-2018-ci illərdə Milli Təhlükəsizlik Şurasının icraçı katibi, 2018-2021-ci illərdə isə Birləşmiş Ştatların vitse-prezidentinin müşaviri vəzifələrində çalışıb.
Kelloq 1944-cü ildə anadan olub. O, Vyetnam müharibəsində və Körfəz müharibəsində (1990-1991), həmçinin ABŞ-ın Panamaya müdaxiləsində iştirak edib. 1967-2003-cü illərdə hərbi xidmətdə olub.
Musavat.com
