Neft qiymətləri, ABŞ-da benzin ehtiyatlarının gözlənilməz artması və investorların bu həftə sonu neft hasilatına dair OPEC+ görüşünə diqqət yetirmələri ilə azalıb.
Qaynarinfo "Reuters"ə istinadla xəbər verir ki, Brent markalı neftin gələcək müqavilələri 14 sent, ya da 0,2% ucuzlaşaraq 72,69 dollar/barel təşkil edib, ABŞ-ın West Texas Intermediate markalı neftinin gələcək müqavilələri də 14 sent, ya da 0,2% azalaraq 68,58 dollar/barel olub.
Ticarətin ABŞ-da Şükran Günü münasibətilə başlayan bayram səbəbindən qeyri-aktiv olması gözlənilir.
ABŞ-da benzin ehtiyatları, 22 noyabrda başa çatan həftə ərzində 3,3 milyon barel artıb, halbuki bayram tətili üçün gözlənilən benzin ehtiyatlarının azaldılması ilə bağlı gözləntilər var idi.
Amerika Birləşmiş Ştatları və Çin kimi ən böyük yanacaq istehlakçılarında tələbin artmasının yavaşlaması, 2024-cü ildə neft qiymətlərinə böyük təsir göstərib. Lakin OPEC+ tərəfindən, OPEC üzvləri ilə yanaşı, Rusiya və digər müttəfiqlərin hasilat məhdudiyyətləri tətbiq etməsi, qiymətlərin daha da enməsinin qarşısını alıb.
OPEC+ görüşü bazar ertəsi günü keçiriləcək. Qrupun üzvləri, yanvar ayında başlanması planlaşdırılan neft hasilatını artırmağı ertələmək məsələsini müzakirə edirlər.
Brent və WTI markalı neftlər bu həftə İsrailin Livanın "Hizbullah" qruplaşması ilə atəşkəs barədə razılaşmasının təsiri ilə 3%-dən çox dəyər itirib. Atəşkəs çərşənbə günü başlayıb və bu, Yaxın Şərqin ən böyük neft istehsalçısı regionundan neft təchizatının pozulması narahatlığını azaldıb.
Qeyd edək ki, neft qiymətləri, 26 noyabr çərşənbə axşamı ticarətin başlanğıcında əvvəlki sessiyada düşdükdən sonra artmışdı, çünki investorlar İsrail və "Hizbullah" arasında potensial atəşkəsin neft risk premiumuna təsirini dəyərləndirirdilər.
Alpər
