ABŞ kəşfiyyatı müəyyən edib ki, Şimali Koreya qoşunlarını Ukraynaya qarşı hərbi əməliyyatlarda iştirak etmək üçün göndərmək ideyası Moskvadan deyil, Pxenyandan gəlib.
Azpost.info xəbər verir ki, bu barədə “The New York Times” ABŞ-dakı rəsmi mənbələrə istinadən yazıb.
Nəşr qeyd edir ki, təşəbbüs iki ölkə arasında strateji tərəfdaşlıq sazişinin imzalanmasından dərhal sonra yaranmayıb.
“Vladimir Putin təklifi dərhal dəstəklədi, lakin Şimali Koreya onun yardımı müqabilində dərhal heç nə almadı. Mənbələr bildirirlər ki, hazırda Kim Çen In Moskvadan texnologiya, Qərblə qarşıdurmalarda diplomatik dəstək və böhran vəziyyətlərində digər yardımlar şəklində gələcək təşəkkürə ümid edir”, – məlumatda deyilir.
Şimali Koreya ordusu artıq döyüş əməliyyatlarında iştirak edir və itkilər verir. “New York Times”ın Kiyevdəki mənbəsi bildirir ki, Rusiya tərəfi bu itkiləri gizlətməyə çalışır.
ABŞ rəsmiləri deyirlər ki, Şimali Koreya cəbhəyə ən yaxşı qoşunlarını göndərib, lakin onların real döyüş təcrübəsi yoxdur. Hələlik ABŞ rəsmilərinin fikrincə, onların iştirakının effektivliyi sual altında qalır.
Azpost.info
