“Liverpul”un mərkəz müdafiəçisi və kapitanı Vircil van Deyk daha bir neçə il ən yüksək səviyyədə oynamağa hazır olduğunu bildirib.
Arena.az nüfuzlu italyan jurnalist-insayder Fabritsio Romanoya istinadən məlumat verir ki, niderlandlı futbolçu həmçinin “Liverpul”a olan məhəbbətini etiraf edib:
“Mən bu klubu sevirəm, klub da məni sevir. Mən azarkeşləri sevirəm, azarkeşlər də məni sevirlər. Fikrimcə, mən ən azı daha üç-dörd il ən yüksək səviyyədə oynaya bilərəm. Gəlin görək, gələcək bizə nələr gətirəcək”, deyə Van Deyk vurğulayıb.
Daha əvvəl isə niderlandlı futbolçu “qırmızılar”la cari müqaviləsinin yenilənməsi ilə bağlı sualı cavablayaraq, bu xüsusda heç bir yeniliyin olmadığını bildirib:
“Xəbərlər yoxdur, amma müəyyən edilmiş müddət də yoxdur. Gəlin görək, gələcək bizə nələr gətirəcək”, – “This is Anfield” dərgisi Van Deykdən sitat gətirir.
Vircil van Deyk 2018-ci ilin yanvarından “Liverpul”da çıxış edir. “Qırmızılar” Van Deyki o vaxt 84,65 milyon avro məbləğ müqabilində “Sauthempton”dan transfer ediblər. Van Deykin “Liverpul”la müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Van Deyk “Liverpul”un heyətində bütün yarışlarda 22 oyuna çıxıb, 2 qol vurub, 1 məhsuldar ötürmə verib.
Niderlandlı müdafiəçinin mersisaydlıların heyətində çıxışının ümumi mənzərəsi isə belədir: 292 oyun, 25 qol, 13 məhsuldar ötürmə.
Van Deyk “Liverpul”la İngiltərə Premyer Liqasını (2020), İngiltərə Kubokunu (2022), İngiltərə Liqa Kubokunu (2022, 2024), İngiltərə Super Kubokunu (2023), Çempionlar Liqasını (2018/2019), UEFA Super Kubokunu (2019/2020), FIFA Klub Dünya Kubokunu (2019) qazanıb. Vircil həmçinin “Liverpul”un oyunçusu kimi 2018/2019-cu illər mövsümündə ilin oyunçusu mükafatına və həmçinin həmin mövsümdə UEFA-ya görə Avropanın ən yaxşı oyunçusu mükafatına layiq görülüb.
Vircil Van Deyk hazırda kapitanı olduğu, 2015-ci ilin oktyabr ayında debüt etdiyi Niderland yığmasının heyətində 78 oyuna çıxıb, 9 qol vurub.
“Transfermarkt” internet-portalı 33 yaşlı niderlandlı mərkəz müdafiəçisinin transfer dəyərini 28 milyon avro məbləğində qiymətləndirir.
