1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Türkiyənin İstanbul şəhərində özü kimi 19 yaşında olan Ayşenur Halil və İkbal Uzuner adlı iki qızı vəhşicəsinə qətlə yetirdikdən sonra intihar edən Semih Çeliklə bağlı istintaqda yeni detallar üzə çıxıb.
Oxu.Az "Turkiye gazetesi"nə istinadən xəbər verir ki, mətbuatda "Edirnekapı qatili" adını alan Çelikin qonşusu qətl günü baş verənləri ilk dəfə danışıb.
"Hadisə baş verən gün bağırtı səsləri eşitdim. Sonra saat ikinin yarısında Çeliki qazanxananın qapısında gördüm. Odun kimi görünürdü. Titrəyirdi. Ağappaq idi.
Mən Ölən qızı da görmüşdüm, gəlib gedirdi. O evdən əvvəllər də ara-bir qışqırıq səsləri gəlirdi. Ata qışqırır, söyürdü. Uşaq da atanın üstünə qışqırırdı. Nə ana, nə də ata bizə pislik edib. Amma hərdən qışqırırdılar", - deyə qonşu bildirib.
O, Çeliki "əməlli başlı dəli" deyə təsvir edib.
Xatırladaq ki, oktyabrın 5-də Türkiyənin İstanbul şəhərinin Fatih rayonunda psixoloji problemləri olan 19 yaşlı Semih Çelik adlı şəxs İkbal Uzuner adlı qızın başını bıçaqla kəsərək Edirnekapı qala divarlarından aşağı atıb. Daha sonra Çelik boğazına ip keçirib və özünü qala divarlarından ataraq intihar edib. O, həmin gün daha əvvəl öz evində digər sevgilisi Ayşenur Halil adlı 19 yaşlı qızı da vəhşicəsinə qətlə yetirib.
Qeyd edək ki, qatilin telefonuna baxış zamanı onun üzvü olduğu qrupda bir mesajlaşma tətbiqi üzərindən özlərini "incel" kateqoriyasına aid edən şəxslərlə əlaqə saxladığı ortaya çıxıb.
Məlumata görə, ingiliscə "involuntary celibacy" ("məcburi subaylıq") ifadəsinin qısaltması olan "incel" qadınlara və yaşadıqları cəmiyyətə düşmən münasibət bəsləyən, şiddətə və zorakılığa meyilli insanları ifadə edir.
Həmçinin Semih Çelikin evində şeytani ünsürlərin və ayinlərin əks olunduğu şəkillər aşkarlanıb.
